المرأة الصعيدية المنتقبة ل جمال الحفني

في يوم عادي جدا, أمي نزلت السوق تشتري خضار, الشمس كانت حامية والزحمة في كل مكان, وفجأة وقفت قدامها ست صعيدية منقبة, واقفة ثابتة وسط الزحمة كإنها مش من المكان, قالت لأمي بصوت واطي, بنتك تعبانة وجوزها بيشوف اللي هي مش شايفاه..

أمي اتجمدت مكانها من الخوف, مين الست دي؟ وعرفت اللي بيحصل مع بنتي وجوزها إزاي؟

قالتلها تعالي على جمب, أمي من النوع اللي بيخاف جدا من الناس ومش اجتماعية بالمرة, لكن بسبب الكلام اللي قالته الست دي حست إن العلاج ممكن يكون على إديها وراحت معاها فعلا, الست خدت امي في ركن في السوق وقالتلها جوز بنتك بيشوف بنتك كدا, وراحت رفعت النقاب بتاعها..

أمي قالتلي شوفت وشها وكان بشع, وش مش متناسق, العيون مش قصاد بعض, واحده منهم فوق شوية والتاني تحت شوية, ومفتوحين بطريقة تخوّف, وابتسامة غريبة مش مفهومة, وش كأنه متجمع من قبح وجوه الناس كلها..

أمي سمعت من الست دي تفاصيل محدش يعرفها غيري أنا, حتى قالتلها حاجات أنا نفسي مكنتش اجرؤ أحكيها مع أمي, حكتلها عن الكوابيس اللي بشوفها, عن نفور جوزي ناحيتي, عن القرين أو التبيعة اللي بتغير مني, عن حاجات كتير مينفعش أحكيها لكنها كانت صادقة جدا وفي كل كلمة, ولما الست دي خلّصت كلام, قالت لأمي لازم تلحقوها قبل ما يفوت الأوان..

أمي قالتلها نلحقها إزاي؟؟

راحت

الست دي طلعت من صدرها ورقه ملفوفة, فيها لقيمات عيش مكسورة ومخلوط بيها شوية حاجات وقالت لأمي خليها تحط الحاجات دي تحت المخدة ومش هييجي شهر عشرة إلا وهي حامل, وقتها احنا كنا في نص شهر تمانية..

فعلا عملت كدا وبعدها ربني أكرمني وحملت, ولما حكيت لجوزي اللي حصل مع أمي والست دي لقيته متفاجئ جدا وقال فعلا أنا كنت دايما لما ابص عليكي ألاقيكي مضايقة ووشك مكشّر, وعاقده حواجبك ببعض, مع إني ولله الحمد على قدر من الجمال, وقبل ما اتجوز لما كنت اخرج كتير كنت بشوف نظرات إعجاب الشباب بتلاحقني فين ما اروح, وجوزي كان بيحبني جدا لكن بمجرد ما اتجوزنا والمشاكل بدأت وبقى يبعد عني بشكل غريب, وبينام في أوضة لوحده ومش مهتم بيا ولا طايق يشوفني, وقتها كنت في تالته ثانوي..

فضلنا سنة على الحال دا وكنت أوقات أبات عند ماما, ولما ييجي ياخدني كان بيبصلي بنظرات حب وإعجاب فظيع كإنه أول مرة يشوفني, وما بيصدق يخلص القعدة معانا وياخدني بيتنا وهناك بلاقي النظرات اختلفت بشكل كامل وبيحاول يتجنبني بدون ما اعرف السبب..

كنت أوقات بحلم إني واقفة في مكان غريب وعلى بعد كام متر شايفاني واقفة قصادي بس بشكل مختلف كإني من الجن, وساعات كمان بحلم بناس أعرفها ملبوسة وعندها مشاكل مع الجن والعفاريت وبكون عارفة دا كويس في الحلم, ساعات احلم إني في المقابر,

وأحلام تاني كتير كلها مرتبطة بالجن والشياطين..

كمان جوزي فيه عادة إنه ساعات بينسى باب الحمام مفتوح, فلما احلم بكوابيس واقوم من النوم بلاقي الباب مفتوح والليالي اللي تعدي عليا في سكينة وسلام بيكون الحمام مقفول بس مكنتش أعرف إن دا السبب في البداية يعني, واللي خلّاني عرفت في مرة جوزي نام قبلي وأنا كنت لسه هدخل في النوم, جوزي رجع من الحمام وساب الباب مفتوح وبمجرد ما نام جمبي سمعت صوت في ودني بيقولي قومي اقفلي باب القبر المفتوح دا بدل ما أأذيكي!

وأنا صغيرة قبل ما اتجوز كنت في سادسة ابتدائي يعني, حصلت معايا حاجه تقريبا هي بداية كل حاجه والسبب الرئيسي في اللي بيحصلي حاليا..

بنت عمي كانت في الثانوي وهربت بسبب مشاكل في البيت وفضلت هربانه يوم واتنين, اليوم دا بابا جي خدني, فكان بيكلم قرايبي سمعتهم بيقولوا طب ماهي معاها اخوات صبيان! قصدهم على بنت عمي, لكن بابا قال لا هو عايز بنت وتكون بنت بنوت..

وقتها رحت بيت عمي ولقيت راجل غريب وشكله ميطمنش, قعدت قدامه وقال اطفوا نور الأوضة وقالي غمضي عينك ومتفتحيش غير لما اقولك, وبدأ يقرا حاجات ووقتها رجلي كانت بتتحرك لوحدها ومش فاكرة بالتفصيل اللي حصل يومها بس فاكرة الموقف نفسه..

رجعت يومها وأمي شافتني متغيرة, نمت كتير ودي مش عادتي, راحت امي اتصلت بجدي وحكتله اللي

حصل, وجدي اتصل بشيخ صاحبه وحكاله ويومها صاحبه دا قعد يزعق ويقول مين المتخلف اللي رضي بكدا, انتوا عارفين كان ممكن يعمل فيها ايه!

دا هو كدا قدّمها هدية للجن مقابل إنه يعرف بنت عمها هربت فين, المهم أبويا لما عرف غضب وراح يدور على الشيخ اللي جابني عنده لكن ملقاهوش, كان زي فص ملح وداب..

والشيخ صاحب جدي دا جي وبدأ يعالجني وخدت كام يوم على الحال دا, ولما كان يقرا قراّن كانت رجلي اللي الشيخ اللي قبل محضّر عليها كانت تتحرك لوحدها بدون ما اتحكم فيها..

ومن بعدها لحد ما اتجوزت وانا بحلم ببيت عمي وبيت عمتي اني بدخلهم وفيهم جن, وحاجات منهم بتقع, ولحد دلوقتي بحلم بالبيوت دي إن بيلبسني جن وأنا على عتبة باب منهم, لدرجة إني في ليلة صحيت وأنا منهارة من الأحلام دي وبقيت اصرخ واضرب على وشي واقطع هدومي..

المهم إني الحمد لله حاليا تمام وحامل, دعواتكم ربنا يكملي على خير.. وبالمناسبة أنا مغطيه كل مرايات البيت ومش بقف قدام مراية غير للضرورة, ولو نسيت وبصيت كتير بتعب..

قصة حقيقية..

أنا كتبتلكوا قصة حقيقية وكاملة بدون أجزاء وفيه قصص كتير غيرها في الرسايل, لو اتفاعلتوا عليها وعملتوا مشاركة هكمل باقي القصص على جزء واحد وكاملة, متفاعلتوش يبقى ارجعلكوا بعد رمضان إن شاء الله.

لو خلصت قراءة اكتب تم
ومتنساش تضغط متابعة عشان

يوصلك كل جديد

جمال الحفني