في السوبر ماركت قصة حماده هيكل

كنت سهران في السوبر ماركت بتاعي 
هو محل صغير كدا على اده في حارة  بس في اخر المنطقه مطرف شويه حوالين مني كام بيت
وبعد مني منطقه زراعية كبيرة
الساعه عدت 1 بعد نص الليل ولقيت مراتي بتكلمني
وبتطلب مني اجيب بامبرز للواد وفينو وجبنه وانا جاي
قولتلها حاضر قفلت معاها
ولقيتها بعتالي رسالة ع الواتس
قصة وعبرة مكتوب فيها
سألت زوجة زوجها هل انا جميلة
فقال لا
سألته هل ترغب ببقائي معك للأبد
فقال لا
هل خطرت على بالك في وقت ما
قال لا
هل أنت معجب بي
قال لا طبعا
هل تريدني
قال لا طبعا
هل ستبكي إن تركتك
قال لا
هل عندك استعداد أن تعيش لأجلي
قال لا
هل تستطيع فعل شيء ما لأجلي
قال لا
ثم قالت اختار الآن - إما أنا وإما حياتك
فقال حياتي
وهي ترحل بعيدا, امسك بذراعها وطلب منها ان تبقى وقال
السبب في أنك لست جميلة لأنك رائعة
السبب في أني لا اريد البقاء معك للابد لأني بحاجة ان تبقي معي للأبد
السبب في أنك لا تخطرين على بالي لأنك لا تغيبين عن بالي
السبب في أنني لست معجب بك بل أنني أحبك ولست مجرد معجب
السبب في أنني لا أريدك بل انني أحتاجك أكثر مما أريدك
السبب في أنني لن أبكي إن تركتيني بل أنني سأموت قبل أن أتمكن من البكاء
السبب في أنني غير مستعد للحياة من

أجلك بل أنني على استعداد للموت من أجلك
السبب في أنني لن أفعل شيء ما من أجلك بل إنني على استعداد لفعل كل شيء من أجلك
السبب في أنني اخترت حياتي لأنك أنتي حياتي
عجبتني القصه ولسه هقفل والم البضاعه
اللي بره
عشان اقفل المحل
سمعت صوت خطوات بسرعه جايه ناحية المحل
الدنيا كانت ضلمه شويه
ولقيت ست في منتصف العمر وعلى وشها علامات
الذعر وهي بتتلفت وراها وحاطه ايدها على جنبها
وقالت بصوت ضعيف
لو سمحت
ايوه أؤمريني
ممكن استخبى عندك
نعم
بسرعه الله لا يسيئك
في ايه بس
ابوس ايدك مفيش وقت
طيب افهم
هيخلص عليا دخلني بسرعه
هو مين
فجأة لقيتها جريت جوه واستخبت في ركن ورا شوية كراتين
ولسه بحاول افهم في ايه
سمعت صوت حد جاي بيجري ووقف قدام المحل والشر باين في عينيه  وهرش في رأسه واتلفت يمين وشمال
وبعدها سألني
لو سمحت
نعم
مشوفتش ست عدت هنا من شويه
ست
بصيت بعيني ناحية الكراتين ولمحت نظراتها
المرعوبه وگانها بتترجاني مفضحش امرها
بص لي وسألني تاني
مالك ساكت ليه
لا مفيش
مفيش ايه
مفيش اي ست عدت من هنا دلوقت
متأكد يعني
ايوه ليه هو في حاجه
ملكش فيه يا عم انت
انت مين يا عم وايه حكايتك بالظبط
وانت مالك أنا سألت سؤال وانت رديت وخلصنا
ومن غير سلام كمان
وبعدها سابني ومشي وهو بيقول
هلاقيكي لو رجعتي لبطن امك هتروحي مني فين
بعد ما مشي واختفى من الشارع
روحت ناحيتها عشان اسالها
قربت منها بهدوء وندهت عليها
يا ست اطلعي من عندك هو خلاص مشي و
لسه هكمل جملتي انصدمت لما شوفتها وهي
واقعه ع الأرض
حاولت افوقها
يا ساتر يارب
ايه الليله اللي مش فايته دي
جايالي منين انتي بس هتلبسيني مصيبه شكلك
حاولت افوقها لكني لقيتها قاطعه النفس خالص
وجسيت نبضها لقيت لسه فيها الروح
حمدت ربنا ومسكت علبة مناديل وسحبت منها كام واحد وحطيتهم على مكان الجرح عشان احاول اوقف النزيف
واتصلت بسرعه على خالد صاحبي اللي بيته قريب مني
عشان اقوله  يجيب التوكتوك بتاعه عشان نلحق نوديها
اقرب مستشفى
رد عليا ولسه بيقول
ايه يا صاحبي اخبارك
فينك يا خالد
انا هنا في مشوار قريب منك
طيب انا عايزك لسه هكمل جملتي
لقيت حد واقف ورايا وشد مني الفون
وقالي
كنت متأكد انك بتكدب عليا
وضربني بلكميه في وشي
ورمي الموبايل ع الأرض
ساعتها وقفت بسرعه ومسكته من رقبته وخنقته
وذقيته بره المحل لكن جسمه كان اجمد مني
مسكني من رقبتي ودفعني لجوه
وقعت ع الأرض واتجه ناحية
الست وقرب منها وهو بيقول
مش قولتلك انا مش هسيبك
في اللحظه دي كنت مسكت ازازة حاجه ساقعه
وخبطته بيها اختل توازنه
وبصلي بغضب وراح رفعني بايديه من رقبتي من ع الأرض
وانا بحاول افك قبضته من على رقبتي
ولكن غضبه مني كان أقوى من أني أفلت أيده
وصعبان عليا الست اللي بتموت دي
وحاسس اني مش عارف اعمل حاجه
وابتديت اتخنق والأكسجين يخلص
وبكح جامد وابتدت صوابعي تضعف وسبت قبضته
تتحكم وتضغط اكتر على رقبتي
وحسيت أنها النهايه لكن فجأة كان وصل صاحبي
وضرب الراجل من ضهره فلتني من ايده وقعت ع الأرض
واشتبك مع خالد وجريت انا اطمن ع الست
لقيتها بتنازع
مسكت حبل ولفيته عليه وشديته جامد
وخالد نزل فيه ضرب  واتمكنا منه
وربطناه كويس في المحل وقفلت عليه واتصلت بالشرطه
وطلبت من خالد يشيل معايا  الست وياخدها بسرعه لأقرب مستشفى
والحمدلله لحقناها بأعجوبه بعد ما كانت خلاص هتودع
ودا بعد ما اتبرعتلها بكيس دم مكان اللي نزفته
واتخيط مكان الجرح
والشرطه قبضت على الراجل اللي اتضح
أنه طليقها وفي مشاكل كتير بينهم
وهما من قرية جنبنا واستغل أنها لوحدها
مع بنتها في البيت
لكن قدرت تهرب منه لغاية ما جت لحد عندي
والقدر حطني قدامها عشان أنقذها
أهلها تاني يوم جم القسم شكروني بعد ما قفلنا المحضر
قولتلها لا شكر على واجب والحمدلله انها بخير
وربنا يطمنكم عليها
حاولوا يدوني فلوس مقابل التلفيات في المحل
لكن قولت عيب تحاسبوني على خير عملته
انا اجري عند الله  والمهم انكم تخلوا بالكم من بنتكم
ويتم شفاها على خير
تمت
كتابة Hamada M Nagi