حماتي قاعدة معانا بقالها 8 شهور...
حماتي قاعدة معانا بقالها 8 شهور...
خسرت شقتها بعد خناقة مع صاحب البيت بسبب مخالفة هي رفضت تصلحها جوزي اتحايل عليا توافق تقعد معانا مؤقتاً لحد ما تحوشلها قرشين وأنا طبعاً كنت هبلة وافتكرت الموضوع أسبوعين تلاتة.
الست عندها 61 سنة وشغالة بارت تايم في كوافير وبتاخد مرتب كويس بس بتضيعه كله على الشوبنج والأكل بره مابتصرفش سنت في البيت ولا بتساعدني انها تاخد بالها شويه من بنتي اللي عندها 4 سنين كل اللي بتعمله إنها متبتة في أوضة الضيوف قدام التليفزيون وتحدف كلام زي سم وتتريق على طريقتي في رص غسالة الأطباق أو لبس بنتي.
وكمان اكتشفت إن جوزي كان بيدفع لها قسط العربية وفاتورة الموبايل من ورايا من حسابنا المشترك. اتخانقنا خناقة كبيرة ووعدني إنه هيقول لها يا تشارك في المصاريف يا تمشي آخر الصيف وطبعا الصيف خلص وهي لسه مبلطه فيها.
إمبارح كنا عاملين عزومة شوي بسيطة للجيران وزمايل جوزي كنت مجهزة كل حاجة وحماتي جت من الشغل وبدأت تتنقور عليا البرجر استوى زيادة الجبنة دي وحشة ليه ملبستيش البنت الفستان اللي أنا جبتهولها طنشت كالعادة.
بعدين بنتي دلقت عصير على هدومها حاجة عادية يعني قلت لها روحي غيري هدومك في الأوضة هنا بقى حماتي فيوزتها لاسعت قعدت تزعق وتقول
قلت لها
البنت عندها 4 سنين وده مجرد حادثة.
صوتها علي أكتر وقالت
إنتي إزاي تردي عليا قدام الضيوف؟ إنتي بتكسفيني قدام الناس! الناس كلها سكتت والبرجر اتحرق وزميل جوزي وقف والأزازة في إيده مذهول.
قلت لها بهدوء
أظن إنتي محتاجة تدخلي جوه تهدي شوية.
راحت صرخت فيا قدام الكل
يا تخينة يا اللي بهدلتي ابني هو كان زي الفل لحد ما إنتي دبستيه بالخلفة دي.
أنا طولي 170 سم ووزني 72 كيلو مش رفيعة بس مش ضخمة بس الموضوع مش جسمي الموضوع كان سيطرة أنا ابتسمت مش ابتسامة فيك ابتسامة حقيقية لاني عرفت إني خلاص مش عايزة الست دي في حياتي.
دخلت أخدت بنتي وشنطتي وطلعت من وسط الناس من غير ولا كلمة ركبت عربيتي ورحت لبيت أختي.
بعد 20 دقيقة موبايلي مابطلش رن جوزي بيبعت
"إنتي فين؟"
"ارجعي"
"ماما تعبانة وصعبانة عليها نفسها"
"إنتي مكبرة الموضوع".
ماردتش لمدة ساعتين ولما ردت بعت له رسالة واحدةشيك إيجار مامتك هيطلع يوم 1 في الشهر
اتصل بيا فوراً ماردتش.
بعت رسالة تقصدي إيه؟.
كتبت له
قصدي المصاريف اللي بتدفعها أوتوماتيك لعربيتها وموبايلها شيك الإيجار كمان هيدفع؟.
قال لي:
أرجوكي
قلت له
جاوب على السؤال.
قال لي
إنتي عارفة إنها مابتتفعش إيجار
قلت له
تمام. يبقى تروح تنام على الكنبة في أي حته بقى.
دخلت على حسابنا في البنك ولغيت كل الدفع التلقائي لأي حاجة باسمها. قسط العربية فاتورة الموبايل حتى حساب "نتفليكس" اللي بتستخدمه. كله اتمسح.
جوزي اتصل 6 مرات ورا بعض كنت بحمي بنتي وماردتش.
الساعة 9 بالليل كان باعت 17 رسالة مابين "أرجوكي متعمليش كده"
"إنتي قاسية"
"دي أمي".
بعت له
مامتك قالت عليا تخينة وإني دبستك في الخلفة قدام زمايلك والجيران خليها هي بقى تدفع فواتيرها.
الصبح صحيت على فويس ميل منها مابتعتذرش بالعكس بتشتم وبتقول إني حقودة وسافلة وإنها هتعرف الناس كلها حقيقتي.
بعدين جوزي اتصل وهو بيعيط بجد قال إن أمه اتصلت بيه بتصوت عشان قسط العربية اترفض وموبايلها هيفصل ومش عارفة تعمل إيه.
قلت له
هي عندها شغل
قال لي
إنتي عارفة إن مرتبها ميكفيش كل ده
قلت له
كانت تفكر في كدة قبل ما تهيني قدام الناس في العزومة.
الموضوع زاد سوء حماتي راحت بيتنا النهاردة وجوزي في الشغل د وبدأت تلم حاجتها والجيران بعتولي إنها عمالة تزعق وتخبط وتزعق وتقول إنها هتبلغ البوليس إني سرقت حاجاتها.
جوزي اتصل بيا من
البوليس جه البيت أمي قالتلهم إنك قفلتي البيت في وشها وسرقتي حاجتها.
قلت له
أنا مقفلتش البيت على حد انا مش فالبيت اصلا هي معاها مفتاح وسرقت إيه اساسا؟
اتصلت بالبوليس وحكيت الموقف بهدوء الظابط قال لي إن دي مشكلة مدنية وهي لازم تيجي تاخد حاجتها لو عايزة تعزل ومفيش سرقة طالما ملمستش حاجتها.
سألت الظابط عن قوانين الطرد بما إنها قاعدة بقالها أكتر من 30 يوم قال لي لازم أقدم ورق طرد رسمي لو رفضت تمشي.
كلمت محامي وقدمت ورق الطرد النهاردة قدامها 30 يوم وتمشي
جوزي عرف واتصل يهلل
انتي بتطردي أمي! إنتي ازاي تعملي كدة؟
قلت له
هي شتمتني وقالت إني دبستك قدام الناس وإنت دافعت عنها
قال لي
أنا مدافعتش عنها.
قلت له
إنت قلتلي ارجعي وإنها تعبانة وماخليتهاش تعتذر إنت كنت عايزني أرجع أطبطب وادلع وأمشي الدنيا كالعادة
سكت.
عيلته كلها بتتصل بيا دلوقتي خالته ابن خاله حتى أبوه اللي مبيكلموش كلهم بيقولوا إني بهد البيت عشان كلمة واحدة قالتها وإنها عصبية ومكنش قصدها.
أختي بتقول إني صح وصاحبتي بتقول كان المفروض أعمل كده من شهور.
بس أنا بفكر في جوزي وهو بيعيط وفي عربيتها اللي ممكن تتاخد منها لو مدفعتش هل أنا فعلاً قاسية ولا ده حقي؟
بنتي سألتني النهاردة
إحنا هنروح
قلت لها هانت بس الحقيقة أنا مش عارفة قصدي بيتنا القديم ولا بيت جديد ليا أنا وهي بس.
