الجزء الثاني والثالث من قصة سحر

الجزء التاني

بعد وقت مش عارفه قد ايه باب الأوضه خبط اتفزعت في الاول لكن افتكرت إني كلمت خالد وقلتله ييجي، قمت فتحتله الباب ووبدأت ابكي من أول وجديد وهو مستغرب ومش عارف فيه ايه وهو عمال يسأل حصل ايه فيه ايه والقلق باين جدا في نبرته قلتله أخيرا وأنا بنهنه أنا مش مستحملة العيشة دي أنا زهقت، قالي وهو مستغرب فيه إيه هو أنا زعلتك في حاجه أو حصل مني حاجه قلتله بسرعه لا مش انت، بص بصراحه فيه حاجات كتير غريبة بتحصل معايا هنا قالي اقعدي بس واحكيلي لعله خير، قعدت علي طرف السرير وحكيتله على كل حاجه حصلت من يوم ما سكنا في الشقة دي والحلم اللي شوفته وكمان اللي حصل من شويه، قالي اكيد بيتهألك منا عايش معاكي اهو مبتحصليش ليه الحاجات اللي بتحصلك دي قلتله دا اللي مش عارفه معناه وعلى فكرة الحاجات دي بتحصلي وانت مش موجود إنما طول مانت في البيت مفيش ولا أي حاجه غريبة بتحصل.

فكر شويه وقالي مش عارف طب بصي تيجي نخرج نتعشى بره طيب ممكن يكون اللي انتي فيه دا بسبب الملل والخنقة قلتله بسرعة لا مش عايزه اخرج خليك بس جمبي ومتمشيش، قالي حاضر هقوم بس أغير هدومي وانتي قومي اعمليلنا

اتنين ليمون ساقعين كدا من إيدك الحلوه ولا اقولك هغير هدومي واروح اعملهم أنا خليكي انتي مرتاحة، غير هدومه وخرج من الأوضة وبعد شوية جي ومعاه اتنين ليمون شربناهم وقالي متقلقيش يا حبيبتي أنا بس مضغوط اليومين دول وأوعدك بعد ما يخلص الشهر دا هنشوف شقة تانية تكون قريبة من شقتكوا عشان لما اروح الشغل تروحي تقعدي مع مامتك أو تزوريها من وقت للتاني.

كلامه ريحني وفرحني طبعا وقالي كمان بس عشان خاطري متخضنيش خضة زي دي تاني انتي متعرفيش أنا جيت على اّخري ازاي, هزيت راسي بمعنى حاضر راح ابتسملي وباس على راسي وقالي هروح الحمام، اتأخر جدا، ناديت عليه مردش ، خفت عليه وقمت بسرعة اطمن عليه لكن ملقيتوش في الحمام ولا في أي مكان في الشقة رجعت الأوضة تاني عشان أرن عليه لإن تليفوني فيها لقيته بيرن عليا وبيقولي معلش يا حبيبتي مسمعتش الرنة بتاعتك خير فيه حاجة؟
قبل ما ارد عليه عيني جات على كبايتين الليمون لقيت واحده منهم فاضية والتانيه مليانة على آخرها ، ومش عارفة ليه قلتله لا يا حبيبي مفيش كنت بطمن عليك بس

الجزء الثالث

بعد اللي حصل دا واتكرر معايا للمرة التانية عرفت إن اللي معايا

مش عاوزين أو مش عاوز جوزي يعرف حاجه من اللي بتحصل ومكنتش عارفة هل دا مجرد تخويف ولا ممكن تكون حاجه تانيه أنا مش عارفاها ، لكن اللي حصل معايا بعد كدا أكدلي إن دا مش تخويف ولا حاجه لإني في يوم وانا برتب السرير وافرشه لقيت ورقة صفرة محطوطة بعناية بين المرتبة والمفرش، ورقة باهتة والكلام اللي عليها مكتوب بخط الإيد وشكله مقارب لخط النسخ من جماله لكنه مكتوب بالإيد مش على الكمبيوتر أو آلة كاتبة حتى .
الورقه ريحتها غريبة وأقرب ريحه ليها ممكن تكون ريحة القرنفل أما الكلام اللي مكتوب عليها مش مفهوم، آه كنت عارفه اقراه لكن الجمل مكانتش راكبة على بعضها، كنت متأكدة إن الورقة دي مكتوبة علشاني وإن جوزي مهما حصل مكانش هيشوفها حتى لو كانت قدامه، المهم حطيتها على جمب لحد ما اشوف حد بيفهم في الحاجات دي شيخ مثلا أو دجال حتى بس كانت نيتي طبعا إن جوزي ميعرفش لحد ما أشوف حل للمشكلة اللي أنا فيها لإني اتأكدت إن محدش هيعرف يخرجني من المشكلة دي غيري.

حطيت الورقة جمب الأباجورة ورحت أفرش السرير وارتبه وانا بالي مشغول بيها، بعد ما خلصت وجيت اّخدها عشان اشيلها لحد ما اشوف حكايتها،

لقيتها محطوطة في كوباية المياه ولما ركزت أكتر لقيتها بتتحلل جواها زي متكون قرص فوار وجزء كبير منها داب بالفعل في المياه، اتلبخت ومعرفتش اشيلها ولا لا ولا مين اللي حطها في الكوباية انا متأكدة اني حطيتها بعيد عنها، المهم قربت منها بخوف ورفعت الكوباية فوق شوية كدا وأنا براقب الورقة بشكلها الغريب وهيا بتتحلل جواها وفجأة وأنا ماسكاها لقيت جسمي اتكلبش وبقي ثابت على وضعية ومعرفتش أحرك أي عضو فيه لكن عضو واحد بس اللي كان بيتحرك .. إيدي وبالأخص إيدي اللي ماسكه بيها الكوبايه كانت بتتحرك لكن مش بإرادتي، قربت ناحية بقى غصب عني وانا بحاول أقفل بقي أو ابعد الكوبايه عنه لكن معرفتش، وفي اللحظة اللي دابت فيها الورقة كلها في المياه كنت بشرب منها، ومعرفتش اتحكم في أي جزء من جسمي غير لما شربت الكوبايه كلها وبعدها وقعت من إيدي اتكسرت، طعم المياه مكلنش وحش كان طعم القرنفل برضه بس مر شويه، جسمي مسخنش أو وقعت على ركبي ورفعت وشي لفوق وانا بتألم والعروق بتظهر في رقبتي زي ما بشوف في الأفلام، ولا أي حاجه من دي حصلت لكن اللي حصل بعدها كان أغرب من أي فيلم شوفته قبل كدا

لو خلصت

قراءة اكتب تم