سر الإبنة الذي اكتشفته الأم... حصريآ علي موقع لمحة بقلم الهواري
فضلت قاعدة على السرير شوية ماسكة العلبة في إيدي ومش قادرة أعمل أي حاجة لا قادرة أعيط ولا حتى أتحرك وكأن جسمي قرر يسيبني لوحدي أواجه اللي في دماغي.
كنت بقول لنفسي
يمكن مش ليها يمكن واحدة صاحبتها نسيته يمكن في تفسير أنا مش شايفاه.
بس كل يمكن كنت بقولها كان في صوت تاني جوايا بيرد عليها بهدوء قاسي
ويمكن لأ.
قمت من مكاني ورجعت العلبة مكانها بالظبط نفس الجيب نفس الوضع كأني بخاف تغير مكانها يفضحني كأني أنا اللي عاملة حاجة غلط مش هي.
قعدت في الصالة أستناها ترجع
الدقايق كانت بتمشي تقيلة
كل صوت عربية تحت البيت كان يخوفني
وكل مرة أسمع المفتاح في الباب وأطلع ألاقيه حد تاني قلبي يقع أكتر.
لما دخلت كانت عادية
زيادة عن اللزوم.
سلمت علي دخلت المطبخ فتحت التلاجة وسألتني وهي بتبص جواها
في أكل
الصوت ده
النبرة دي
ولا كأن في شنطتها سر قادر يهد بيت كامل.
بصيتلها وأنا بحاول ألقط أي حاجة أي شرخ أي توتر بس وشها كان هادي وده اللي خوفني أكتر من لو كانت متلخبطة.
قلت لها وأنا عاملة نفسي طبيعية
أكلك جاهز بس مالك اليومين دول
لفت وبصتلي بسرعة ابتسامة خفيفة ظهرت واختفت
مالي مفيش عادي يعني.
كلمة عادي طلعت منها تقيلة
تقيلة أوي.
سكت.
وسكوتي كان بيصرخ.
دخلت أوضتها وقفلت الباب وأنا فضلت مكانى سامعة صوت القفل الصوت اللي بقيت أكرهه وحاسة إن بيني وبين بنتي باب تاني اتقفل مش من خشب من أسرار.
في الليلة دي ما نمتش.
كل الذكريات عدت قدامي
وهي صغيرة
وهي بتجري علي أول ما تقع
وهي بتحكيلي كل حاجة من غير خوف.
وسألت نفسي سؤال واحد فضل يلف في دماغي لحد الفجر
إمتى بنتي بطلت تحكي
ومين السبب
وأنا
أنا مش هينفع أفضل ساكتة
بس المواجهة دي لو حصلت غلط ممكن أضيع بنتي للأبد.
وفي اللحظة دي فهمت إن البرشام مش هو المشكلة الحقيقية
البرشام مجرد بداية لحكاية أعمق أخطر
وحاسة إن اللي جاي مش هيكون سهل على أي واحدة فينا...
قعدت طول اليوم اللي بعده أراقب
مش بعين أم بتدور على غلطة
بعين واحدة بتحاول تفهم قبل ما تحكم.
عملتلها أكلها المفضل
ضحكت معاها
سألتها عن المدرسة
وسمعت إجابات قصيرة عادية محفوظة.
كنت مستنية اللحظة الصح
مش عايزة مواجهة تخليها تقفل أكتر
ولا سؤال يطلع إدانة.
وبالليل وأنا بحضر الشاي
سمعت صوت المفتاح في الباب.
مش هي.
دخلت أختي.
وجودها في اللحظة دي كان غريب
بس يمكن ربنا اختار الوقت بنفسه.
سلمت علينا قعدت وفضلت تحكي عن شغلها
وبنتي كانت قاعدة معانا
ساكتة مركزة في الموبايل
بس ودنها معانا.
بصيت لأختي فجأة وقلت وأنا عاملة نفسي بهزر
قوليلي يا سمر إنتي لسه بتاخدي نفس العلاج اللي الدكتور كان كاتبهولك
بنتي رفعت عينيها فجأة.
أختي اتلخبطت ثانية
ثانية واحدة بس
بس كانت كفاية.
قالت
آه بس وقفته من شوية.
بنتي شدت في مكانها
وشها شحب
وإيديها اتقبضت على الموبايل.
سكت.
ما ضغطتش.
سيبت الصمت يعمل شغله.
بعد شوية بنتي قامت وقالت بصوت واطي
أنا داخلة أوضتي.
قامت ومشيت.
وأنا بصيت لأختي
نظرة واحدة كانت كفاية.
قالت وهي بتتنفس بعمق
إنتي عرفتي صح
ما رديتش.
كملت هي صوتها واطي ومكسور
البرشام اللي لقيتيه مش بتاعها.
قلبي وقع
بس ما ارتاحش.
قالت
أنا اللي كنت باخده بس خبيته في شنطتها من غير ما تفهم كنت بخاف جوزي يشوفه وكنت فاكرة
حسيت الأرض بتتهز تحت رجلي.
مش من الصدمة
من الإحساس بالذنب.
قلت بصوت مخنوق
إنتي حطيتيها في موقف ممكن يدمر علاقتي ببنتي وإنتي مش حاسة
دموعها نزلت
أنا ما كنتش متخيلة
وفي اللحظة دي
باب أوضة بنتي اتفتح.
كانت واقفة
سمعت كل حاجة.
بصتلي
نظرة عمري ما هنساها.
نظرة واحدة اتكسرت من الشك
بس اتجرحت من حاجة تانية أعمق.
قالت
يعني إنتي ما صدقتي
الكلمة دي ضربتني أكتر من أي اعتراف.
قربت منها خطوة
بس هي رجعت خطوة لورا.
وقالت بصوت ثابت بس موجوع
أنا سامعة وفاهمة بس عمري ما هنسى إنك شكيتي.
وساعتها عرفت
إن البرشام طلع بريء
بس القصة لسه ما خلصتش.
لأن في حاجات
حتى لما الحقيقة تظهر
ما بترجعش زي الأول.
فضلت واقفة مكانى بعد ما بنتي دخلت أوضتها وقفلت الباب
الباب ده بقى رمز لحاجات كتير اتقالت من غير كلام
وأكترها وجع.
أختي حاولت تتكلم
بس رفعت إيدي ووقفتها
مش وقت لوم
ولا وقت عتاب
الوقت كله كان رايح ناحية أوضة بنتي.
خبطت على الباب خبطة خفيفة
مش خبطة أم بتأمر
خبطة واحدة بتستأذن.
ممكن أدخل
ما جاش رد.
قعدت على الأرض قدام الباب
آه قعدت
لأني حاسة إن الوقوف مش هيخليني قريبة منها
والقرب هو كل اللي فاضلي.
قلت وأنا باصة للأرض
أنا غلطت مش في التفتيش لأ في إني خفت ومشيت ورا خوفي بدل ما أجي لك وأسألك.
الباب فضل ساكت.
كملت وصوتي كان بيتهز
أنا أم يعني بخاف بس ده مش مبرر إني أشك فيك ولا إني أسيب الشك يعيش جوايا لحد ما يبقى حكم.
سمعت حركة خفيفة من جوه
بس الباب ما اتفتحش.
قلت
إنتي مش مطالبة تبرري ولا تحكي ولا حتى تسامحي دلوقتي بس صدقيني أكتر حاجة وجعتني في اللي
اتفتح الباب سنة صغيرة
عين واحدة باصة
حذرة.
قالت
إنتي ما سألتينيش إنتي حكمتي.
الجملة دي كانت صح.
قاسية
بس صح.
قلت لها
علشان كده أنا هنا مش علشان أدافع عن نفسي علشان أقولك إني مستعدة أتعلم أسمع تاني حتى لو ده هياخد وقت.
سكتت شوية
وبعدين فتحت الباب أكتر.
دخلت أوضتها
قعدنا على السرير
مسافة صغيرة بينا
مسافة كانت أكبر من متر وأصغر من الوجع.
قالت وهي باصة في الأرض
أنا عمري ما عملت حاجة غلط بس أول ما شكيتي حسيت إني لو كنت عملتها الإحساس مش هيبقى أبشع من كده.
الكلام ده كسرني.
مديت إيدي
ما لمستهاش
سيبت القرار ليها.
وبينا صمت
مش صمت غاضب
صمت بيحاول يداوي.
بس وأنا فاكرة إن الأسوأ عدى
ما كنتش أعرف إن في سر تاني لسه مستخبي
سر مش في شنطة
ولا في أوضة
سر كان في قلب البيت نفسه.
ما عداش يومين على اللي حصل
والبيت كان هادي زيادة عن اللزوم
النوع اللي يخوف أكتر ما يطمن.
بنتي بقت أهدى
مش زعلانة
بس مش قريبة
وأنا بقيت بحاول أتعلم أكون موجودة من غير ما أضغط.
أختي
كانت مختلفة.
كلامها قليل
عيونها دايما في الأرض
وتلفونها ما بيفارقش إيديها
وكل شوية تطلع البلكونة تكلم حد بصوت واطي.
وفي ليلة
كنت معدية من جنب أوضة السفرة
سمعتها.
مش كنت متجسسة
الصوت هو اللي كان عالي.
أنا مش قادرة أكمل كده
لو عرف كل حاجة هتضيع.
وقفت.
قلبي اتقبض.
سمعت صوت راجل من السماعة
مش واضح
بس نبرته حادة.
دخلت المطبخ وأنا عاملة نفسي ما سمعتش حاجة
بس دماغي كانت شغالة.
تاني يوم
وأنا وبنتي بنحضر الفطار
أختي دخلت فجأة
وشها شاحب.
قالت بصوت مكسور
لازم أحكيلكم
بنتي بصتلي
وأنا شديت الكرسي وقعدت.
قالت وهي بتلف الخاتم في صباعها بعصبية
البرشام ما كانش بس علشان الحمل
سكتت.
بلعت ريقها.
جوزي بيشك فيا
وبيفتش في حاجتي
وبيتحكم في كل نفس في حياتي.
بنتي
