حساب السنين بقلم منال علي

 

سمعت عنك كتير، وعن تضحياتك عشان توصل للي إنت فيه ده.
سيد كان بيبلع ريقه بصعوبة، وشاهيناز بدأت تبص لمريم بشك وغيرة أهلاً يا حبيبتي.. إنتي قريبة ياسين؟
مريم لفت لشاهيناز وابتسمت ابتسامة صفرا أنا وياسين عشرة عمر يا شاهيناز هانم.. وزي ما بيقولوا، اللي يجمعنا أكتر بكتير من اللي يفرقنا.
في اللحظة دي، طفلة صغيرة عندها 4 سنين، لابسة فستان أبيض زي الملايكة، جريت على سيد وقالت بابا.. نونا عايزة تشرب.
مريم أول ما شافت البنت، الدنيا دارت بيها.. دي نورا.. بنتها.. حتة من قلبها.
البنت بصت لمريم للحظة، وسكتت.. كأنها حست بحاجة غريبة، حاجة شدتها للست دي من غير ما تعرف ليه.
سيد خد البنت بسرعة وكأنه بيخبيها من مريم وقال بصوت مهزوز أهلاً.. أهلاً يا مريم هانم.. نورتي الحفلة.
مريم بصت لسيد وهو شايل بنتها، وقالت في سرها الحساب تقل قوي يا سيد.. والنهاردة

هبدأ أسحب البساط من تحت رجلك خيط خيط.. لحد ما تقع على جدور رقبتك.
الحفلة خلصت، بس الكابوس بالنسبة ل سيد كان لسه بيبدأ. مريم مسبتوش يتنفس؛ بدأت تدخل في كل صفقاته عن طريق ياسين الألفي، وبقت الخيال اللي بيطارده في كل اجتماع. سيد بدأ ينهار، يشرب كتير، ويغلط في الحسابات، وشاهيناز بدأت تلاحظ إن الكلب المطيع بتاعها مابقاش مركز غير مع مريم الألفي.
المواجهة الكبرى..
في مكتب سيد الفخم، دخلت مريم من غير استئذان، وقفلت الباب وراها بالمفتاح. سيد قام مفزوع إنتي عايزة مني إيه؟ خدي الفلوس اللي إنتي عايزاها وغوري من حياتي.. شاهيناز لو عرفت هتطربق الدنيا علينا!
مريم ضحكت ببرود وقعدت على الكرسي بتاعه فلوس؟ الفلوس دي أصلاً شقايا وتمني ال 3 سنين اللي ضاعوا من عمري. أنا مش عايزة فلوس يا سيد.. أنا جاية آخد نورا، وآخد شرفك اللي بعته عشان البدلة دي.
طلعت مريم فلاشة ورمتها على المكتب دي عليها تسجيلات وصور ل لعبة الاختلاس الجديدة اللي إنت عاملها من ورا الحج ممدوح.. وكمان نسخة من الدفاتر القديمة اللي أنا كنت شايلاها في مكان محدش يعرفه. لو الفلاشة دي وصلت لشاهيناز وأبوها، إنت مش بس هترجع السجن.. إنت هتتفرم تحت رجلين رجالة الحج ممدوح.
سيد وقع على ركبه بجد أبوس إيدك يا مريم.. بلاش نورا.. بلاش الفضيحة.
مريم وقفت وقربت منه، وطت وهمست في ودنه بكلمات زي الرصاص إنت متستاهلش حتى الرحمة. قدامك 24 ساعة.. تتنازل لي عن حضانة نورا، وتوقع على إقرار رسمي بإنك اللي اختلست الفلوس زمان، وتختفي من مصر خالص.. يا إما الفلاشة دي هتكون حبل المشنقة بتاعك.
النهاية..
بعد يومين، الدنيا اتقلبت. سيد عبد الحميد فص ملح وداب، هرب برا مصر بشنطة هدومه بس، بعد ما شاهيناز عرفت غدره ورمته في الشارع وطردته من الشركة ومن حياتها، وبلغت عنه في قضايا نصب ضخمة. بقلم منال علي 
في شقة مريم الجديدة، الشمس كانت طالعة والجو هادي. مريم كانت قاعدة على الكنبة، وفجأة الباب خبط. فتحت لقيت ياسين الألفي ومعاه نورا.
البنت بصت لمريم للحظة، وبعدين جرت عليها بقوة وهي بتقول ماما؟ إنتي ماما اللي في الصورة صح؟
مريم انفجرت في العياط، بنتها كأنها بتعوض ال 1095 يوم اللي ضاعوا من غيرها. ياسين وقف عند الباب وابتسم حقك رجع يا مريم.. وسيد دلوقتي بيدفع التمن في الغربة، شحات ومالوش أصل.
مريم بصت لياسين بامتنان شكراً يا ياسين.. لولاك كان زماني لسه تايهة في شوارع السيدة.
ياسين هز راسه المهم نورا رجعت.. والدنيا لسه فيها حق وعدل، حتى لو اتأخر شوية.
مريم قفلت الباب وهي شايلة بنتها وبصت لورقة الطلاق القديمة وقطعتها ميت حتة ورمتها في الزبالة. النهاردة مريم الشاذلي بدأت
حياة جديدة.. حياة مفيهاش سيد، بس فيها نورا وحرية حقيقية مابتخلصش.