بعد مالمعازيم بقلم منال علي

بعد ما المعازيم يمشوا... إنتِ اللي هتغسلي المواعين وتنضفي الشقة كلها لوحدك!
قالتها حماتها بنبرة كلها أوامر، كأن منى مش مرات ابنها... لأ، دي واحدة جاية تشتغل عندها ببلاش.
منى هزت راسها من غير ما تنطق بكلمة، وبصت على جبل المواعين اللي مالي المطبخ... وابتسمت.
كانت أول مرة تبتسم من قلبها بقالها سنة كاملة.
لأنها كانت عارفة إن النهارده... مش هيعدي زي كل مرة.
حكايات منال علي 
إيدين منى بدأت تتشقق من أول الصيف.
وقتها ماكنش فيه لا عزومة ولا مناسبة.
الست أمينة صحّتها من بدري وقالتلها
تعالي يا منى، عايزة أروق الشقة قبل ما صاحبتي تيجي تقعد معايا.
منى راحت من غير ما تناقش.
غسلت الشبابيك...
ورتبت الدولايب...
ودعكت البوتاجاز...
وشالت كراتين وحاجات قديمة كانت مركونة بقالها سنين.
أما حماتها ...
فكانت قاعدة مرتاحة على الكنبة، ماسكة فنجان القهوة، وكل شوية تطلع لها بأمر جديد.
امسحي هنا كويس.
رتبي الدولاب ده من الأول.
خدي بالك من البوتاجاز.
ولما منى خلصت، بصتلها بابتسامة وقالت
الله ينور عليكي... باين عليكي ست بيت شاطرة.
منى فرحت بالكلمتين.
افتكرت إن الست أمينة أخيرًا بدأت تعتبرها واحدة من العيلة.
هي وأحمد كانوا متجوزين بقالهم سنة بعد قصة حب كبيرة.
فرحهم كان بسيط... لكن كان مليان حب وضحك، وكل واحد فيهم وعد التاني إنه هيبقى سنده.
حصري على صفحه روايات واقتباسات 
مكنتش تعرف إن كل عزومة بعد كده هتبقى بالنسبة لها يوم شغل كامل... من غير حتى ما تلحق تاكل لقمتين وهي قاعدة.
في الأول...
هي اللي كانت بتقول
سيبوني أساعد.
كانت تروح قبل أي حد.
تقطع السلطة.
وتتبل اللحمة.
وترتب السفرة.
وتطلع الأطباق.
ولما المعازيم يمشوا...
تقف عند الحوض تغسل المواعين، عشان كانت تستعيب تسيب حماتها لوحدها.
الست أمينة كانت تقول قدام الناس وهي مبسوطة
ربنا يباركلي فيها... مش زي ناس تيجي تاكل وتمشي وكأنها معملتش حاجة.
أحمد كان ساعات يقول
خلاص يا منى... سيبي شوية وأنا أساعدك.
لكن أمه كانت ترد بسرعة
تساعدها في إيه يا أحمد؟ سيبها... هي بتخلص كل حاجة نضيفة وسريعة.
وأحمد...
كان كل مرة يسكت.
مرة...
وبعدين مرة تانية...
لحد ما بقى ده الوضع الطبيعي، ومحدش بقى مستغربه.
قبل أي عزومة بكام يوم...
الست أمينة تبعت لها رسالة
هاتي خمس كيلو لحمة.
اعملي السلطات بإيدك، بلاش الجاهز.
اطلبي التورتة من المحل اللي قولتلك عليه وروحي هاتيها بنفسك.
ومتنسيش العصاير.
ومنى كانت ترد تلقائي
حاضر.
تخلص شغلها...
وتلف على السوبر ماركت والجزار والمخبز.
تشيل أكياس تقيلة لحد ما إيديها توجعها.
وترجع البيت بالليل تحضر الأكل.
ولما ييجي يوم الإجازة، تروح من الصبح بيت الست أمينة تكمل طبخ وتجهيز.
أما باقي العيلة...
فكانوا يجوا على الجاهز.
لابسين شيك.
وشايلين هدية ولا بوكيه ورد.
ويقعدوا على السفرة وهي جاهزة.
وكل شوية حد يقول
يا سلام يا ست أمينة... بيتك دايمًا يفتح النفس.
إيه الترتيب والحلاوة دي!
والست أمينة كانت تبتسم وتاخد كل المدح كأنه شغلها هي.
أما منى...
فكانت تمسح إيديها في فوطة المطبخ...
وتدخل تطلع طبق جديد.
في مرة...
رجعت من السوق شايلة أكياس تقيلة موت.
إيديها كانت وجعاها من تقل الشنط.
وكتافها خلاص مش قادرة تشيل.
أحمد خد منها كيسين.
فقالت له
يا أحمد... كلم مامتك بقى... اللي بيحصل ده زاد عن حده.
رد وهو بيهز كتفه
ما هي شايفة إن مفيش حد يعرف ينظم الحاجات دي زيك.
بصتله وقالت وهي مخنوقة
أنا مش أشطر حد... أنا بس اللي شايلة كل حاجة لوحدي.
ابتسم ابتسامة باهتة وقال
يا ستي... هو إحنا هنتخانق عشان شوية سلطات؟
الكلمة نزلت عليها زي الحجر.
مش عشان السلطة...
لكن عشان لأول مرة تحس إن كل تعبها في نظر جوزها... ولا له أي قيمة.
في كل عزومة...
منى تقريبًا عمرها ما كانت بتقعد.
واحد عايز عيش.
واحدة عايزة شوكة.
حد عايز يسخن الأكل.
وحد طالب كباية شاي.
والست أمينة تنادي من بعيد
يا منى... هاتي الصوص.
يا منى... شيلي المواعين.
يا منى... طلعي الحلو.
وفي آخر الليلة...
رجليها كانت بتترعش من التعب.
لكن أصعب لحظة...
كانت بعد ما الكل يمشي.
المطبخ كله يبقى مقلوب.
الست أمينة تدخل أوضتها ترتاح.
العيلة تمشي.
وأحمد يرمي نفسه قدام التلفزيون.
ولما منى تقوله يساعدها...
يرد بكل برود
والله أنا كمان تعبان... خلصي بسرعة ويلا نمشي.
فضلت مستحملة.
كل مرة تقول لنفسها
يمكن في يوم يحسوا بيا.
لكن الأيام كانت بتعدي.
والطلبات بتزيد.
وكلمة تسلمي بقت نادرة.
أما صوتها...
فكان بيختفي واحدة واحدة.
لما جه عيد ميلاد أحمد...
الست أمينة قررت من نفسها إن العزومة هتبقى عندها.
وقالت بثقة
البيت عندي أوسع... وأنا هبعتلك ليستة المشتريات.
ولا حتى فكرت تسأل منى إذا كان عندها أي خطة تانية.
الأسبوع كله...
منى كانت في ساقية.
شغل...
سوق...
طبخ...
تحضير...
تنضيف...
ولما جه يوم الجمعة...
إيديها رجعت تحرقها من كتر الميه والمنظفات.
أحمد شاف الاحمرار وقال بتردد
يمكن متتعبيش نفسك أوي.
بصتله وقالت
ولو أنا متعبتش... مين هيعمل كل ده؟
سكت...
وماعرفش يرد.
حكايات منال علي 
العزومة كانت دوشة وضحك.
الناس بتضحك...
والكبايات بتخبط في بعض...
وكل واحد بيهني أحمد بعيد ميلاده.
أما منى...
فكانت رايحة جاية بين المطبخ والصالة.
كل شوية حد ينادي عليها.
كانت بتبتسم...
لكن من جواها كانت حاسة إن محدش شايفها كبني آدمة.
كل اللي شايفينه...
إيدين شغالة وبس.
حكايات_منال_علي
قرب نص الليل...
آخر معزوم مشي.
المطبخ بقى عامل زي ساحة معركة.
حلل...
ومواعين...
وكبايات...
وترابيزة كلها بواقي أكل.
وكيس الزبالة بقى هيطق.
أحمد رمى نفسه على الكنبة وقال
ياااه... أنا اتكسرت.
أما الست أمينة...
عدلت طرحتها قدام المراية، وبصت ناحية المطبخ وقالت بمنتهى البرود
بعد ما المعازيم مشيوا... إنتِ اللي هتغسلي المواعين وتنضفي الشقة كلها لوحدك.
منى بصت للمطبخ...
وبعدين قلعت المريلة براحة.
وقالت بكل هدوء
حاضر.
ابتسمت الست أمينة وهي راضية وقالت
أيوه كده... هو ده الكلام. أنا داخلة أريح شوية... ومتعمليش دوشة.
ولسه داخلة على أوضتها...
قالت منى بصوت هادي، لكنه كان حاسم
بس استني يا ست أمينة... قبل ما تدخلي، عايزاكي إنتِ وأحمد تشوفوا حاجة الأول.
وقفت الست أمينة مكانها.
وأحمد رفع عينه من الموبايل باستغراب.
طلعت منى ملف رفيع من شنطتها...
وحطته على السفرة...
جنب المواعين المتكومة...
يتبع ...
قبل ما ينزل الجزء الجاي... تتوقعوا إيه اللي في الملف اللي حطته منى على السفرة؟ 
أحمد قرب من السفرة وهو بيبص للملف باستغراب
إيه ده يا منى؟
منى ما ردتش عليه فورًا.
فتحت الملف بهدوء، وطلعت منه كذا ورقة متدبسة، وحطتهم قدامهم.
الست أمينة قربت بنظارتها وقالت بضيق
أوراق إيه دي؟ هو إحنا ناقصين وجع دماغ؟
منى بصتلها لأول مرة من غير خوف وقالت
لأ دي مش وجع دماغ. دي حسابات.
أحمد عقد حواجبه
حسابات إيه؟
منى قلبت أول ورقة ناحيته.
كل اللي دفعته في عزوماتكوا خلال السنة اللي فاتت.
سكت المكان.
الست أمينة ضحكت باستهانة
يعني إيه؟ هتحاسبينا على شوية أكل؟
منى هزت راسها
أنا مش بحاسب حد على الأكل.
وقلبت الصفحة التانية.
دي فواتير اللحمة والخضار والعصاير والتورت والحلويات وكل حاجة اتطلبت مني.
وبعدين حطت ورقة تالتة فوقهم.
ودي مصاريف المواصلات اللي دفعتها من جيبي وأنا بجيب الطلبات.
أحمد بدأ يقلب في الأوراق واحدة واحدة، وملامحه اتغيرت.
إنتِ كنتِ محتفظة بكل ده؟
منى ابتسمت ابتسامة هادية
أيوه.
الست أمينة رفعت صوتها
وإنتِ كنتِ بتعملي كل ده عشان الفلوس؟!
منى بصتلها
لو كنت بعمله عشان الفلوس، كنت طلبتها من زمان.
سكتت لحظة، وبعدين قالت
أنا كنت بعمله عشانكم وعشان أحمد وعشان كنت فاكرة إن ده معناه إني بقيت من العيلة.
الكلمة خلت أحمد ينزل عينه.
لكن المفاجأة الحقيقية كانت في آخر ورقة.
منى طلعتها ببطء، وحطتها قدام أحمد تحديدًا.
والورقة دي أهم واحدة.
أحمد بص فيها.
وبمجرد ما قرأ أول سطر، وشه اتغير تمامًا.
إيه ده؟!
الست أمينة قربت بسرعة
في إيه يا أحمد؟
أحمد ما ردش.
كان بيقرأ الورقة مرة تانية، وكأنه مش مصدق اللي مكتوب.
منى قالت بهدوء
أنا ما كنتش ساكتة عشان ضعيفة يا أحمد.
وبصت له مباشرة
كنت مستنية أشوف هتفضل ساكت لحد فين.
أحمد رفع عينه لها، لأول مرة مش عارف يقول كلمة.
أما الست أمينة
فكانت لسه مش فاهمة إيه اللي في الورقة.
مدت إيدها وخطفتها منه.
لكن أول ما قرأت محتواها
اتجمدت مكانها.
مين اللي كتب الكلام ده؟!
منى ردت
الشخص اللي شاف كل حاجة بعينه.
الست أمينة بصتلها بخوف
شخص مين؟!
منى ما جاوبتش.
لمّت باقي الأوراق وحطتها قدام أحمد وقالت
أنا مش طالبة منك تعتذرلي.
ولا طالبة من أمك تعتذرلي.
أنا بس عايزة أعرف حاجة واحدة
سكتت لحظة.
لو كنت أنا أختك كنت هتقبل إن حد يعاملني بالطريقة دي؟
أحمد فتح بقه عشان يرد
لكن فجأة سمعوا صوت جرس الباب.
مرة.
واتنين.
وتلات مرات ورا بعض.
الست أمينة بصت ناحية الباب بتوتر.
مين اللي جاي دلوقتي؟
منى قربت من الباب، لكن قبل ما تفتحه، سمعت صوت من الناحية التانية
أنا جاي آخد حاجة تخصني وحان وقت إنكم تعرفوا الحقيقة كلها.
أحمد وقف من مكانه بسرعة.
لأنه عرف الصوت.
وكان آخر شخص يتوقع إنه يظهر في اللحظة ديأحمد فضل واقف مكانه، وعينيه ثابتة على الباب.
الست أمينة قربت منه