وصية عشق بقلم إسراء ابراهيم

مصطفى عاجبك المكان اللي بنتك هتعيش فيه ده انا مش عارفة ازاي انت وافقت علي حاجة زي دي
مصطفي عمل نفسه مسمعش وقام سلم علي مالك وفضلو يتكلمو سوا ويوصيه مصطفي علي بنته وكانت قاعدة ريم بفستان فرحها وهي متوترة وبتبص لاهل الحارة بخجل واحراج منهم وهما بيتفرجو عليها وكأنها عروسة لعبة وكله كان مبهور بجمالها فضلت كدة لحد ما انتبهت لمالك اللي قرب منها فرفعت عنيها وبصتله 
مالك بهمس مبروك يا زوجتي العزيزة
قلب ريم دق جامد وقتها متعرفش ليه وكانت باصة للارض بخجل
تيسير بفرحة مالك خد مراتك بقي وكفايا كدة البنت زي القمر ربنا يسترها عليها من عيون الحارة
خلص الفرح ومشي مصطفي ومها بعد ما وصو مالك كتير علي ريم وتيسير كمان صممت تسيبلهم الشقة وتبات عند اختها عشان يبقو علي راحتهم
مالك بسخرية ايه يا عروسة القطة كلت لسانك المترين ولا عاملة عروسة بجد ومكسوفة
ريم بغضب انت انسان قليل الزوق و
ملحقتش ريم تكمل كلامها لما قرب مالك منها بسرعة ومسك ايديها جامد بطريقة وجعتها وزعقلها
مالك بغضب لسانك ده لو طول تاني انا هقصهولك ومتنسيش انك خلاص بقيتي مراتي يعني اللي اقولك عليه تنفذيه ولو حصل وصوتك علي عليا مرة تانية متضمنيش رد فعلي
ريم اتتفضت ودموعها نزلت بخوف من صوت مالك العالي ووجع ايديها اللي مالك ضاغط عليها جامد من غير ما يحس 

ريم بدموع ايدي يا مالك بتوجعني
مالك فجأة انتبه لنفسه وساب ايد ريم اللي علمت مكان مسكته ليها جامد فاتنهد بغضب وساب ريم ودخل اوضته وهي قعدت عالكنبة بندم اتملك منها علي تسرعها واللي عملته في نفسها 

............................
في نص الليل خرج مالك من اوضته وبص علي ريم لاقاها قاعدة في الارض وساندة دماغها علي رجليها اللي ضاماها لحضنها ونايمة والدموع علي خدها شكلها لوحده وجع قلب مالك فقرب منها وشالها فكانت ريم نعسانة ومش حاسة بحاجة ومالك وقتها قلبه دق اول ما عملت كدة ودخل حطها ﻋالسرير بهدوء وبعد ايديها عنه بس فجأة قلبه اتقبض لما شاف صوابعه معلمة في ايديها مكان ما كان ماسكها لعن نفسه علي غباءه اللي اتعامل بيه معاها وقرر يصالحها اول ما تصحي فسابها ونام جمبها وفضل يتفحص ملامحها بهدوء لحد ما راح في النوم
.......................
تاني يوم صحيت ريم علي صوت جرس الباب فقامت بخضة وبصت حواليها وهي بتستوعب المكان لحد ما افتكرت اللي حصل بليل من مالك وانها كانت نايمة برة ولما انتبهت لمالك اللي نايم جمبيها فهمت انه هو اللي جابها هنا فبصتله بحزن وهو نايم وقامت بهدوء من جمبه واخدت هدومها ودخلت تغير فستان فرحها شوية وخرجت ريم لقت مالك قاعد عالسرير مستنيها بعد ما فتح لامه الباب بصتله بحزن وهو كان بيبصلها بانبهار بسبب رقتها في الفستان اللي كانت لابساه ولاحظ مالك انها تعمدت تلبسه بكم عشان يغطي الكدمة اللي في ايديها فزعل من نفسه لانه عمل فيها كدة 
ريم اتجاهلته وراحت قعدت قدام التسريحة وبدأت تسرح شعرها اللي مفرود علي ضهرها وكان متابعها مالك بعنيه فقرب منها عشان يعتذر منها لكنه اتفاجأ برد فعلها
ريم بغضب انا هكلم بابا واخليه ياخدني معاه وهو ماشي ولو فكرت تعترض انا هقوله علي كل حاجة وعلي اتفاقي معاك
مالك ملامحه اتحولت للغضب بعد ما كان حاسس بالذنب و هيعتذر ويا تري بقي هتقوليله ايه انك اتحايلتي عليا اتجوزك اوي كدة ووافقتي تتجوزي واحد فقير زيي عشان تخلصي من العريس الغني اللي كانت امك جايبهولك بس احب اقولك بقي ان انا اللي ادبست في واحدة متدلعة زيك بتاعة مامي وبابي واصلا متعرفش تفتح بيت واخرها تروح نادي تتفسح لكن انها تتجوز وتبقي ست بيت مسئول منها زوج واسرة ده مستحيل يحصل
ريم بوجع انا يمكن اكون نفسي لما اتجوزتك فعلا لانك متستاهلش واحدة زيي انت تستاهل واحدة شبهك معندهاش قلب وتعرف يا مالك انت فعلا مكنتش تحلم تتجوز واحدة زيي مش لانك فقير لا لانك انسان معدوم الاحساس والمشاعر
مالك كان رافع ايديه عشان يضرب ريم فغمضت عنيها بخوف وهي بتستعد لضربها منه لكن مالك قبض ايديه بغضب وسابها ودخل الحمام وهبد الباب ففتحت ريم عنيها بحزن ووجع وكلام مالك بيتردد في عقلها فمسحت دموعها وكملت تسريح شعرها وبعدين خرجت 
تيسير بفرحة يا الف نهار ابيض الف مبروك يا حبيبتي صباحية مباركة
ريم بابتسامة الله يبارك فيكي يا طنط
تيسير بسعادة لا طنط ايه انا زي امك قوليلي يا ماما واعتبريني امك يا حبيبتي
ريم بابتسامة حاضر يا ماما انا هعمل الفطار عشان نفطر كلنا سوا بعد اذنك
تيسير بلهفة لا يا بنتي انتي عروسة انا هعمله يا حبيبتي
ريم برفض لا طبعا انا هعمله حضرتك ارتاحي بعد اذنك
تيسير بحب بنت اصول يا حبيبتي 
دخلت ريم المطبخ وفتحت التلاجة وطلعت بيض وجبن بس كانت واقفة محتارة تعمل ايه لانها مبتعرفش تعمل حاجة عيونها دمعت لما افتكرت كلام مالك اللي وجعها بيه وقالت لنفسها انه كان عنده حق هي فعلا متعرفش تفتح بيت ولا تكون مسئولة كانت دموعها بتنزل بحزن لحد ما انتبهت علي صوته من وراها
مالك بهدوء انا جيت اساعدك
ريم وهي بتمسح دموعها تمام
مالك شافها وهي بتمسح دموعها وفهم ان كلامه وجعها اوي وخصوصا انها واقفة مش عارفة تعمل ايه فقرب منها ووقف قدامها
مالك بابتسامة ايه رأيك تشوفيني وانا بعمل الفطار وتتعلمي مني 
ريم بتردد ماشي
مالك مسك ايد ريم وقعدها علي الكرسي وبدأ هو يعمل الفطار قدامها فقامت هي وبدأت تساعده وبعد ما خلص مالك الفطار خرج بالاطباق وريم اخدت العيش وخرجت وراه
تيسير بفرحة تسلم ايديكي يا مرات ابني مالك قالي انك عملتي الفطار كله لوحدك
ريم بصت لمالك باستغراب فابتسم هو ليها وكأنه بيعتذر عن اللي قاله بعنيه وريم اكتفت بابتسامة بسيطة وقعدو كلهم ياكلو سوا تحت نظرات مالك لريم اللي كانت سرحانة وعقلها مشغول بكل الكلام اللي قاله مالك واللي للاسف كله صح
...........................
عدت فترة كانت ريم فيها بتحاول تثبت لنفسها ولمالك انها فعلا تصلح زوجة فكانت بتتعلم من تيسير حماتها الاكل بعد ما صارحتها انها مش بتعرف تعمل اي حاجة وتيسير تقبلت الموضوع بحب وفرحت ان ريم طلبت منها تعلمها كل حاجه وفعلا ريم بقت تعمل كل حاجة في البيت حتي هدوم مالك بقت تغسلها لوحدها وفي غسالة عادية والحقيقة انها كانت فرحانة اوي بحياتها البسيطة دي كانت بتستني مالك كل يوم عشان يجيبلها الحاجة الحلوة اللي من وجهة نظرها انها كدة جت علي باله وانه فكر فيها كانت فرحانة ريم بمعاملة مالك اللي ااتغيرت اوي وبقت تعشق تلميحاته واعجابه بيها اللي بتتمني ميكونش وهم معيشة نفسها بيه كانت ريم ماشية مع تيسير في الشارع بيشترو طلبات للبيت وريم كانت فرحانة اوي لانها اول مرة تشوف ناس زي كدة وتعيش وسطيهم فحبت بساطتهم اوي ابتسامتها اختفت وهي شايفة مالك جاي
ومعاه بنت جميلة اوي فملامحها بهتت وحست بقبضة في قلبها
ريم بتردد هي مين اللي جاية مع مالك دي يا ماما 
تيسير بابتسامة دي شهد بنت عمك محمد جارنا تلاقيه قابلها علي اول الشارع
ريم اضايقت اوي بس مبينتش لحد ما قرب هو عليهم
مالك بغيرة انتي ايه اللي نزلك يا ريم مش قولتلك متنزليش السوق ابدا
تيسير بابتسامة ماهي مش لوحدها يا مالك يابني ماهي معايا ولا انا مش مالية عينك بقي 
مالك بهدوء وهو بيبص لريم اللي متجاهلاه اصلا وباصة لشهد بتفحص العفو يا ماما احم شهد قابلتها علي اول الشارع يا ماما كان في شباب بيعاكسوها
ريم اضايقت اكتر والغيرة اتملكت منها فبصت لتيسير
ريم باندفاع انا هروح اشتري طماطم من عمو اللي هناك ده يا ماما علي ما تخلصي هنا 
خلصت ريم كلامها ومشيت بسرعة قبل ما مالك يرد او يعترض وهو كان مستغرب تصرفها فاستأذن من امه وراح وراها واول ما قرب منها لقي شاب واقف جمبها وبيبصلها باعجاب فالغيرة عمته وقرب من ريم بسرعة ومسكها من ايديها وسحبها وراه عالبيت وريم كانت مصدومة من تصرفه وكانت عمالة تكلمه بس هو مبيردش لحد ما دخل بيها الشقة
ريم بغضبممكن اعرف انت ساحبني وراك كدة ليه وحرجتني قدام عمو بتاع الطماطم 
مالك بغيرة احمدي ربنا اني اخدتك ومشيت احسن ما كنت اصور قتيل يا ريم بسببك واياكي تنزلي الشارع تاني لوحدك او مع ماما بعد كدة نزولك معايا انا
ريم بغيرة واندفاع لا يا مالك مش هخرج معاك ابدا انت كفايا عليك الجيران اللي انت بتغير عليهم
سكت مالك فجأة وريم كمان بعد ما سمعت اللي قالته من غير ما تحس وفضلو هما الاتنين يبصو لبعض وبعدين مالك فجأة ابتسم وقرب بخطوات بطيئة ناحية ريم
مالك بخبث افهم من كدة ان دي غيرة 
ريم بتوتر ها لا طبعا بس انا يعني
مالك بابتسامة انتي ايه يا ريم 
ريم بتهتهة اانا عاوزة اشوف ماما اتأخرت ليه
كانت ريم هتجري بعد ما قالت كلامها بس مالك لحقها ومسكها من ايديها فوقفت وبصتله وقلبها بيدق بعنف
مالك بهمسعدي شهرين يا ريم مش شهر واحد زي ما اتفاقنا 
ريم بوجع انت عندك حق احنا اتفاقنا كان شهر واحد عموما تقدر تكلم بابا وتقوله انك هطلقني و
قاطعها مالك وبيقول بابتسامة
مالك بحبك يا ريم وحتي لو كنتي انتي اللي طلبتي تبعدي انا كنت هبقي اناني وارفض ابعد عنك لانك بقيتي روحي يا ريم
ريم بابتسامة ودموع في نفس الوقت يعني موافق تكمل مع واحدة متدلعة ومش بتعرف تشيل مسئولية يا مالك 
مالك بحب انا عندي استعداد عشان اكون معاها اعمل المستحيل حتي لو حكمت اننا ناكل كل يوم اندومي
ابتسمت ريم بخجل وهي بتبص لمالك بعشق شافو هو في عنيها وكان في قمة سعادته وقتها فشالها ولف بيها وهي في نفس الوقت همست ريم ليه بحب 
انا كمان بحبك وعندي استعداد اتعلم كل حاجة بس عشانك انت يا مالك
تمت 
بقلمي اسراء ابراهيم
وصية عشق
ايه رأيكم في المفاجئة دي اسكربت كااامل اهو تعويض عن غيابي انتو كمان شجعوني بقي بكومنتات كتير عشان ارجع انزل اسكربتات من جديد وكل سنة وانتو بألف خير يارب