رواية الغريبة بقلم مروة كاملة
لها جميعا و توجهت لمكانها و أخذ هو يتحدث.
حازم مساء الخير. شكرا لحضوركم كلكم.. شكرا لفارس و نغم و ندى و ادهم اللى عملولنا الفرح دا احلى من اللى كنا متخيلينه بكتير.. و اسمحولى انى احكيلكم حاجه.. انا اول ما شوفت نهله حسيت بإحساس غريب زى اللى كان بيدور على حاجه طول عمره و لقاها.. مكنتش فاهم ليه انا فرحان بأنها بقت معانا للدرجه دى و ايه سبب الارتياح اللى حاسس بيه.. حسيت انها غير اى بنت صادقه و واضحه و نقيه و ملهاش فى المظاهر و لا اللف و الدوران.. كنت دايما متوتر و انا بتعامل معاها و خايف لتكشفنى و تكشف انى اتعلقت بيها من اول ما شوفتها كنت خايف اصلا اعترف لنفسى بدا.
ابتسمت له نهله بحب فرد لها الابتسامه ثم اكمل كلامه مع الوقت عرفت انى بحبها بس هى كانت دايما متجنبانى و خايفه تقرب منى فقررت انى مش هضغط عليها و هستناها لحد ما تحس باللى حاسس بيه لحد ما حصل موقف كدا هى عارفاه كويس فكان لازم انى اصارحها بمشاعرى بسرعه بدل ما تضيع منى نظر لها بحب و ابتسم فأبتسمت لفهمها ما يقصد.
استأنف بعد ذلك قائلا و دلوقتى اسمحولى اقولها سر متعرفهوش.
نظرت له بدهشه فأكمل قائلا من اول ما حسيت بحبك و انا كان فى قصيده لمحمود درويش بقراها كل يوم و كنت ناوى ان يوم ما ربنا يكتبلنا نبقى مع بعض اقرهالك و بدأ فى قراءة كلمات القصيده بصوت عاشق جميل
بكأس الشراب المرصع باللازرود
انتظرها
على بركة الماء حول المساء وزهر الكولونيا
انتظرها
بصبر الحصان المعد لمنحدرات الجبال
انتظرها
بسبع وسائد محشوة بالسحاب الخفيف
انتظرها
بنار البخور النسائي ملء المكان
انتظرها
برائحة الصندل الذكرية حول ظهور الخيول
انتظرها
ولا تتعجل فإن اقبلت بعد موعدها
فانتظرها
وإن أقبلت قبل موعدها
فانتظرها
ولا تجفل الطير فوق جدائلها
وانتظرها
لتجلس مرتاحة كالحديقة في أوج زينتها
وانتظرها
لكي تتنفس هذا الهواء الغريب على قلبها
وانتظرها
لم تستطع نهله التحكم فى دموعها من شدة تأثرها. نظر لها بحب و ختم كلامه بكلمة بحبك.
فردت عليه بحركة شفايفها من بعيد بحبك.
انتهت الحفله و ودعوا الجميع و بقيا حازم و نهله مع اسرتهم.
حازم بجد يا جماعه مش عارف اشكركم ازاى.
فارس متشكرناش على حاجه بس فاضل هديتنا.
حازم هدية ايه.
فى هذا الوقت احضر ادهم الشنطه التى جهزوها لهما و قال فارس احنا حجزنالكم يومين فى فندق هو هيبقى شهر عسل قصير اوى بس انتم عارفين الظروف.
فارس شوفتم كنا زى الهم على قلبه ازاى.
ضحك الجميع و قال حازم بصراحه اه.
ودعوهم جميعا و ذهب حازم و نهله لقضاء اول ليله لهما كزوج و زوجه سويا.
استعدت والدة نهله و خالتها للمغادره فطلب منهما ادهم ان ينتظراه قليلا فى السياره.
خرجت ندى معه إلى باب الحديقه لتودعه.
ادهم عقبالنا يا حبيبتى. فى اقرب وقت ان شاء الله هتبقى احلى عروسه.
ندى مبتسمة لخجل ان شاء الله.
ادهم انا مضطر امشى دلوقتى عشان متأخرش على ماما و خالتى و هما لواحدهم فى العربيه.
ندى اوكى متتأخرش عليهم.
ادهم هتوحشينى.
ندى و انت كمان.
ادهم تصبحى على خير.
ندى و انت من اهله.
الفصل الثانى و الثلاثون
وصلا نهله و حازم إلى الجناح الذى حجزه لهما فارس و انبهرا بذوقه و جماله.
نهله واو بجد فارس ذوقه تحفه.
حازم اه فارس شاطر فى الحاجات دى اوى.. بس احنا هنقضيها فرجه على الاوضه.
نهله مبتسمه ايوا عاوزه اتفرج عليها كويس مش هقعد فيها يومين و لازم اتعود عليها.
حازم اه يا حبيبتى يومين مش سنتين يعنى مش لازم تتعودى عليها هى المهم تتعودى عليا انا.
ضحكت
نهله على تعليقه قائله طيب تعالى نشوف البلكونه.
جذبها حازم اليه و نظر لها بعتاب قائلا هنبقى نتفرج عليها بعدين بدل ما تبردى.
نهله ابرد ليه الجو حلو.. تعالى بس.
حازم نهله بطلى الحركات دى.
نهله حركات ايه بس مش فاهمه.
حازم يعنى دا مش وقت فرجه على الاوضه و البلكونه.
نهله عاوزه اتفرج.
حازم ما هما حاطين اهه لكل واحد فينا طقمين خروج كفايه هو احنا هنروح فين يعنى.
نهله ليه هو احنا مش هنتفسح.
حازم هما يومين هنقضيهم فى الفسح يعنى !
نهله اه انت هتحبسنى من اولها.
حازم يا ربى ايه حظى دا.. فى عريس بيقعد يتخانق يوم فرحه.. هى مامتك مفهمتكيش
نهله ايه اللى دخل ماما فى حوارنا دلوقتى
حازم نهله يا حبيبتى ربنا يهديكى قومى البسيلك حاجة حلوة من اللى فى الشنطه دول دلوقتى.
نهله لا انا متعوده انام و انا لابسه بيجامه.
كانت نهله تشعر بخجل كبير فتعمدت ان تتصنع عدم الفهم و تحاول الا تجعله يتصرف بطريقه تثير خجلها.
شعر حازم بالغضب من تصرفاتها فلم يرد عليها و جلس صامتا.
نهله انت زعلت منى
حازم و هزعل منك ليه يعنى
نهله مش عارفه بس شكلك زعلان.. فى حد يزعل من عروسته فى ليلة فرحهم.
حازم و فى عروسه تعمل كدا فى ليلة فرحها.
نهله انا معملتلكش حاجه انت اللى عصبى.
حازم انا مش عصبى و لا حاجه بس اتفضلى البسى
نهله ابعد يا حازم انا زعلانه منك.
حازم ليه بس يا روحى و انا عملتلك ايه
نهله كلمتنى بعصبيه.
حازم و انا اقدر برضه.
نهله اه قدرت.
حازم خلاص هصالحك.
نهله هامسه حازم انا جعانه.
حازم احنا لسه واكلين فى الفرح قبل ما نيجى.
نهله لا انا مكلتش كويس و جعت لو سمحت خليهم يطلعولنا عشاء.
حازم نهله انتى بتستهبلى و انتى عارفه كدا كويس.
نهله لا انا جعانه فعلا لانى طول اليوم مكلتش حاجه خالص و فى الفرح مكلتش كتير.
ابتسم لها وتنهد.
حازم مبتسما بحنان رغم انى عارف انها حجه بس حاضر لما اشوف اخرتها معاكى.
ابتسمت له نهله فرفع سماعة الهاتف و طلب لهما العشاء ثم عاد لها. اخذها و جلسا على كنبة بالغرفه .
حازم و هو يستنشق رائحتها البيرفيوم اللى انتى حاطاه يجنن.. خلينى اشمه كويس.
رفعت رأسها برقه و نظرت فى عينيه.
نهله حازم انا مكسوفه اوى.
حازم مبتسما لها بحنان يا قلبى انتى.
فى هذا الوقت سمعوا طرقات على الباب الخارجى للجناح فأغلق حازم باب الغرفه عليها و ذهب ليفتح الباب الخارجى للشخص الذى احضر الطعام ثم عاد اليها.
حازم حبيبتى الأكل وصل.. يالا عشان تاكلى.
نهله بخجل حازم عاوزه اقولك حاجه.
فأقترب منها و جلس إلى جوارها.
حازم ايه يا قلب حازم
نهله انا كلت جامد فى الفرح و مش قادره اكل تانى.
حازم عارف يا هبله و شوفت انك كلتى كويس و واثق انك مش جعانه و انها حجه.
حازم متجوز طفله صغيره.
ضربته نهله بخفه.
حازم اااه .. بس بموت فيها.
استيقظت نهله مبكرا كعادتها و لكن حازم كان لا يزال نائما.. نظرت له بحب و اخذت تتأمل ملامحه ثم غادرت الفراش و ذهبت لتأخذ حماما ساخنا.
خرجت و كان لايزال نائما فوقفت تشاهد منظر النيل من شباك
حازم صباح الورد يا قلبى.
نهله صباح الخير
حازم انتى صحيتى من بدرى
نهله من نص ساعه تقريبا.
حازم طيب و مصحتينيش ليه
نهله عشان اسيبك ترتاح.
حازم انا راحتى انى ابقى معاكى.
نهله ربنا ميحرمنيش منك.
حازم و لا يحرمنى منك يا عمرى.. ايه يا روحى بتفضفضى للنيل برضه
نهله اها.
حازم بتقوليله ايه
نهله بدلع دا سر.
ادارها اليه ليصبحا متواجهين و عيونهما تنظران لبعض.
حازم سر على حبيبك
نهله كنت بحكيله عنك.
حازم و قولتيله ايه
نهله قولتله انك احن انسان عليا فى الدنيا و ان امبارح كان احلى يوم فى عمرى.
توجهوا ندى و نغم و فارس لمتابعة العمل فى فترة غياب نهله و حازم.
دخل ادهم مكتب ندى و كانت تتحدث على الهاتف.
ندى خلاص اتفقنا يبقى هشوفك بكره ان شاء الله.. باى.
ادهم بعصبيه دا مين دا بقى اللى هتشوفيه بكره ان شاء الله.
ندى مالك يا ادهم انت عاوز تتخانق و خلاص و لا ايه
ادهم لا بس عاوز افهم.
ندى دا صديق قديم ليا.
ادهم يا سلام.. و انا بقى ايه كيس جوافه
ندى ايه يا ادهم الطريقه دى.. انا هشوفه فى النادى لأنه رجع من السفر بقاله اكتر من شهر و مشفتهوش و هشوفه مع اصحابى كلهم هنبقى بنات و شباب هنتقابل فى النادى.
ادهم و لما انتم كتير اشمعنى هو اللى بيكلمك.
ندى لأن انا الوحيده اللى مشوفتهوش من ساعة ما رجع لأنى كنت مشغوله.
ادهم هو متجوز او خاطب او مرتبط
ندى مش متجوز و لا خاطب بس معرفش اذا كان مرتبط ببنت و لا لا.
سكت ادهم و بدا عليه الغضب.
ادهم طيب انا هاجى معاكى.
ندى عاوز تيجى تعالى بس هعرفك عليهم على انك زميلى فى الشغل مش اكتر.
ادهم بعصبيه و دا ليه
ندى عشان مبقاش محرجه منهم.. و بعدين دا يضايقك فى ايه.
ادهم لا طبعا يضايقنى لأنه ممكن يدى فرصه لاى حد انه يفكر فيكى كأكتر من صديقه.
ندى حتى لو دا حصل ايه المشكله ما هو انا اكيد مش هتجاوب مع الشخص اللى يفكر كدا.
ادهم كدا مش هينفع لما حازم يخلص اجازته انا ليا كلام تانى معاه.
ندى و حازم ماله بقى.. هتشتكيله منى و تخليه يعرف اننا بنحب بعض.
ادهم لا هخطبك منه عشان كل حاجه تبقى رسمى و الكل يعرف و احنا الاتنين نرتاح.
صدمت ندى من كلامه و فرحت كثيرا فلم تتوقع ان تكون نهاية هذا الخلاف اسعد خبر ممكن ان تسمعه.
ادهم ساكته ليه.. كلامى فى حاجه غلط
ندى مبتسمه بالعكس.
ادهم يعنى موافقه انى اكلمه و اطلب ايدك منه.
ندى بفرح اكيد.
ادهم و قد بدأ يهدأ بس برضه هاجى معاكى بكره.
ندى تنور.
ابتسم لها ادهم برضا قائلا اهى رقتك دى بتنسينى كل حاجه.
و بالفعل ذهب ادهم مع ندى للنادى فى اليوم التالى و تعرف على اصدقائها و احبهم و احبوه و وجد ترحاب كبير منهم تجاهه و عرف انهم زملاء و زميلات ندى من ايام الدراسه و ان جميعهم كالأخوه.
مر اليومان على نهله و حازم بسعاده كبيره و كأنهما حلما جميلا لم يريدا الاستيقاظ منه ثم عادا إلى الفيلا فى المساء ليجدا الجميع فى انتظارهما.
ندى وحشتينا اوى.
نهله انتوا كمان وحشتونى اوى.
نغم اتبسطتى
نهله نظرت لحازم و ابتسمت اوى.
فارس نهوله وشك زى القمر و منور هو الجواز بيحلى اوى كدا.
خجلت نهله و لم تعرف بماذا ترد عليه.
حازم يا ابنى الكلام دا عيب فى حقك سيبه للبنات.. بس البنات طلعوا اعقل منك.
نغم قصدك ايه يعنى اننا تافهين و مجانين
فارس استلم بقى اهى البرنسيس هتكلمك عن مكانة المرأه فى المجتمع.
نغم حتى انت كمان يا فارس
فارس لا يا برنسيس بس اصل انا واخد لقب التافه و المجنون دا من زمان فبقيت بعتبره مدح يعنى مش حاجه وحشه.
ندى طيب بطلوا نقير فى بعض و تعالوا ندخل نقعد انتوا هتفضلوا موقفينهم كدا على الباب.
جلس الجميع فى الصاله.
حازم انا مش حابب انكد عليكم بس طبعا انتم عارفين ان ماما جايه بكره.
ندى و ليه بتقول نكد مفيش نكد و لا حاجه تنور و احنا هنعرف نتعامل معاها.
نهله و انا رأيى من رأى ندى.. اكيد هنقدر نتأقلم معاها.
حازم ما هو انا مقصدكوش انتى و ندى.. انتوا الاتنين هتحاولوا تتأقلموا معاها رغم ان الموضوع مش هيبقى سهل زى ما انتوا متخيلين.. بس انا بتكلم عن الاتنين الحلوين بتوعنا.
نغم انا و فارس.
حازم هو فى غيركم!
فارس انا عن نفسى مليش اى تعامل معاها خالص بس لو عملت اى تصرف ملوش لازمه و لا ضايقت اى حد من البنات انا مش هسكتلها.
حازم ايوا افرد نفسك و اعملى فيها حامى الحمى.
ضحك الجميع على تعليقه.
فارس انا مش بهزر و بتكلم جد.
نغم و انا صريحه و مبعرفش اجامل و انتوا عارفين فهحاول اتجنبها على اد ما اقدر.
حازم مش قولتلكم ان الاتنين دول هما اللى قالقينى.
الفصل الثالث و الثلاثون
استيقظت نهله مبكرا لتجد نفسها بجوار زوجها فى غرفتها الجديده شعرت بسعادة لتغير موقفها فلم تعد تشعر بانها غريبة فى بيت غريب. غادرت فراشها و توجهت للحمام لتغسل وجهها و تستعد لصباح جديد و بدلت ملابسها و لكن حازم لم يستيقظ لهذا الوقت فإقتربت منه لتوقظه برقه. فتح عيونه ليفهم انها استيقظت من فتره و جهزت نفسها لتنزل.
نهله صباح الخير.
حازم صباح النور.
نهله مبتسمه ناموسيتك كحلى.. اتعودت على الكسل.
حازم خلينى اتعود على الكسل و الراحه شويه ما انا تعبان طول عمرى.
نهله بس من اول الاسبوع هننزل الشغل.
حازم لما ييجى اول الاسبوع نبقى ننسى الكسل.
جعلها تنام إلى جواره فى الفراش و بدأ حوار بينهما.
حازم هما راحوا الشغل خلاص.
نهله اكيد الساعه دلوقتى 10.. هى مامتك هتوصل امتى.
حازم على الساعه 5 تقريبا.
نهله انت اللى هتروح تجيبها من المطار مش كدا
حازم اها اكيد.
نهله طيب يالا يا دوب تقوم تغير هدومك و ننزل نفطر و بعد كدا تروحلها.
حازم بقولك لسه ميعاد طيارتها الساعه 5 يعنى لسه قدامنا وقت طويل.
نهله قدامنا وقت لأيه
حازم ضاحكا يعنى هيكون لأيه!
فى الشركه كان ادهم فى مكتب ندى يتحدث معها بخصوص موضوعهما.
ادهم متهيئلى خلاص مفيش حاجه دلوقتى تمنعنى من انى اتقدملك.. حازم خلاص رجع الفيلا.
ندى ايوا بس حازم مكملش اسبوع متجوز و هترجع مامته النهارده و ربنا يستر من رجوعها يعنى مش ناقص كمان اننا نشغله بموضوعنا.
ادهم و دا معناه انى المفروض اصبر اد ايه يعنى قبل ما اكلمه.
ندى لحد ما الامور تهدى و هو يفوق شويه.
ادهم ايوا يا ندى بس انا حابب انى افهمه.. انا مش مبسوط انى ادخل بيتكم و انا بينى و بينك حاجه و محدش يبقى عارف.. حاسس انى بستغفلهم يعنى و الله ببقى مكسوف ابص فى وش حازم.
ندى طيب يعنى انت شايف ان الوقت مناسب.
ادهم يا ستى انا كل اللى عاوزه بس انى افهمه الموضوع عشان كل حاجه تبقى بعلمه و وقت ما الامور تستقر نبقى نعمل خطوبه.
ندى يعنى تفتكر انى انا مش حابه انى ارتاح و احس ان اهلى عارفين اللى بيننا.. انا بس صعبان عليا حازم لأنه
ادهم طيب هنعمل ايه
ندى خلينا نصبر لأخر الاسبوع.. تعالى الجمعه الجايه قضى اليوم معانا و ابقى اتكلم معاه.. بس نسيبه لأخر الاسبوع يرتب اموره مع مامته.
ادهم طيب اللى تشوفيه انتى ادرى بأمور بيتكم.
ندى مبتسمة له هانت.. انا مستعجله اكتر منك ان كل حاجه تبقى فى النور.
ادهم مبستما بس عشان تبقى كل حاجه فى النور
ابتسمت ندى بخجل و لم تجب.
ادهم ضاحكا يا ربى هو لسه فى بنات بتتكسف لحد دلوقتى.. دا انا امى دعيالى بجد.
ضحكت ندى على تعليقه.
فى قاعة خاصه بتصوير دعاية الملابس كان فارس يقف مع بنات الدعايا الموديلز يتحدث معهم بخصوص الدعايه و افكارها. كان يضحك معهن فجميع البنات معجبات به و بخفة دمه و يحاولن لفت نظره لهن.
دخلت نغم لترى هذا المنظر و شعرت بغيظ كبير فجميعهن غايه فى الجمال و يتمتعن بقوام ممشوق و أجساد جميله.. اقتربت لتتحدث لفارس.
نغم ايه الاخبار
فارس تمام بناقش مع البنات الافكار.
نغم ااااااه بتناقش الافكار.. طيب و هى الافكار تضحك للدرجة دى
فارس بإستغراب اشمعنى انا مش فاهم حاجه
نغم مفيش بس شايفاهم هيموتوا من الضحك
فارس لا اصل بنت من البنات كانت بتقول حاجه فضحكنا كلنا.
نغم بغيظ طيب انا جهزت العينات اللى المفروض هيلبسوهم تعالى عشان تشوفهم و نختار سوا كل واحده يناسبها ايه اكتر.
فارس طيب استنى انادى عليهم عشان يختاروا معانا.
نغم بعصبيه استنى هنا انت رايح فين.. يختاروا ليه ان شاء الله احنا اللى هنحدد و هما ينفذوا.
فارس ايه يا بنتى الدكتاتوريه اللى انتى فيها دى.. لما البنت تلبس الحاجه اللى عاجباها هتحسها و دا هيظهر عليها فى صور الدعايه هتبقى مبسوطه من الحاجه و واثقه من شكلها بيها و دا هينجح حملة الدعايه.
نغم بتريقه يا حنين.. لازم كل واحده تحس بالحاجه.. لا متخافش انا هخليهم يحسوا غصب عنهم.
فارس انا مش فاهم انتى عصبيه كدا ليه.. و بعدين البنات كلهم متافهمين و لذاذ جدا.
نغم لذاذ جدا.. طيب ممكن تخليك فى شغلك و متدخلش فى شغلى عشان انا فاهمه فيه اكتر منك.
فارس الطريقه دى مش هتنفع على فكره.
نغم لا هتنفع و مينفعش تخلى البنات ياخدوا عليك للدرجه دى.. مش هتعرف تسيطر عليهم بعد كدا.
فارس معلش انا فاهم فى شغلى كويس و
يا ريت انتى كمان متدخليش فى شغلى.. انا اسلوبى مش انى اخوفهم منى بالعكس لازم يحبونى فيعملوا الشغل بحب.
نغم بعصبيه طيب ممكن تيجى معايا نتفق هنعمل ايه.
فارس اوكى.
كانت الساعه الواحده ظهرا عندما نزلا حازم و نهله لتناول الفطور معا و بدأ حوار بينهما على طاولة الطعام.
نهله مالك سرحان فى ايه
حازم قلقان من مقابلة ماما و فارس.
نهله هتفضل حامل هم الموضوع دا كتير.. سيبها على ربنا و ان شاء الله خير.
حازم يا رب ان شاء الله.. مش هتكلمى مامتك اكيد عاوزه تطمن عليكى و هى سابتنا نفرح ببعض اليومين اللى فاتوا
نهله كلمتها امبارح لما رجعنا و انت بتاخد دش بس نسيت اقولك.. بتسلم عليك اوى.
حازم الله يسلمها و يسلم بنتها.
غمز لها فضحكت على تصرفه.
نهله اعمل حسابك انى هسافرلها قريب عشان وحشتنى.
حازم يعنى ناويه تسافرى لوحدك
نهله و الله عاوز تيجى اهلا و سهلا بس انا عارفه انك مش متعود على الجو هناك.
حازم افهم من دا انك عاوزه تبقى لوحدك مع مامتك و بتخلصى منى بالذوق.
نهله لا و الله مش كدا بس خايفه لما تيجى تزهق من قاعدتك لوحدك مع ستات.
حازم حلوه ستات دى.. مبدئيا فى واحده منهم مراتى حبيبتى و مش هقعد هنا لوحدى من غيرها و التانين انا بعتبرهم زى امى.. و انا طبعا هبقى واخد معايا شغلى و اللابتوب بتاعى فمش هزهق و فى نفس الوقت مش هغلس عليكم.
نهله ااااااااااااه يعنى برضو هتبقى جاى تشتغل و مش هتقعد معانا و لا حاجه.
حازم مبتسم انتى مش كنتى هتسافرى من غيرى خالص دلوقتى بقيتى بتعاتبينى عشان هاخد شغل معايا.
نهله كنت هسافر من غيرك عشان انت متضايقش مش عشان مش عاوزاك بس طالما هتبقى معايا يبقى فرصه نبقى مع بعض من غير شغل.
حازم مبتسما لو كدا يبقى يولع الشغل طالما هقعد انا و نهولتى مع بعض و نقضيها عسل فى عسل.
نهله مبتسمه بخجل لأ انت مخك راح لبعيد.
ضحك حازم على خجلها.
فى الشركه كانا فارس و نغم يتناقشا سويا.
نغم ها ايه رأيك الفستان دا تعرضه نهى
فارس لا نهى تبقى احلى بالفستان الاحمر مع بياضها يبقى حلو اوى و كمان لون عنيها الزرقاء.
تعليق فارس و كلامه عن العارضه جعل الدماء تغلى فى عروق نغم و خاصة عندما استطرد قائلا و كمان الذهبى هيبقى حلو اوى على بشرة علا الخمرى.
نغم بغيظ يعنى الاحمر مش هينفع على البشره الخمرى
فارس و هو سارح بخياله ينفع طبعا بس نهى بالأحمر هتبقى كأنها لوحه جميله.
خبطته بقوه فى رجله بحذائها متصنعه عدم القصد و البراءه.
فارس ااااااااااااااااااااااااااه.. ايه يا بنتى اللى عملتيه دا.
نغم ببراءه اوبس.. اسفه يا فارس مخدتش بالى خالص انى خبطتك.. هى وجعتك
فارس وجعتنى بس دا انتى كنتى هتكسريلى رجلى.. ايه الافترى بتاعك دا
نغم سورى يا فارس.. طيب اقعد استريح.
جلس فارس و طلبت نغم لهما عصير فى مكتبها.
نغم بص خلاص انت سيبلى موضوع البنات دا عليا و انا هظبط كل حاجه و انت بس ركز فى الافكار.
و حاولت ان تشغله بموضوع اخر حتى لا يجد اى حجه للتدخل.
نغم مامتك هتوصل كمان كام ساعه ناوى على ايه
فارس بعد تنهيده طويله و الله ما عارف بس اللى ناوى عليه مبدئيا انى بعد الشغل مش هروح على البيت
نغم ازاى
فارس ايه اللى ازاى هخرج و هرجع بليل تكون نامت.
نغم و هتروح فين
فارس البنات النهارده عاملين بارتى و عازمنى عليها.
نغم بقلق و انت هتروح
فارس اه بفكر اروح بقى لأنى مش لاقى حاجه اعملها.
شعرت نغم بصدمه كبيره و حاولت ان تفكر بأى شئ يثنيه عن الخروج معهن فأخترعت حجه سريعه.
نغم يا خساره دا انا كنت هعزمك على مسرحيه حلوه اوى.
فارس مسرحية ايه دى
نغم هاه.
فارس بقولك مسرحية ايه
نغم مسرحية فى المسرح القومى بس سمعت انها حلوه اوى.
فارس خلاص نروح بس اسمها ايه
نغم يااااااااااه يا فارس.. انت لازم تسأل على كل حاجه.. خليها مفاجأه.. بعد الشغل نروح نتغدى و بعد كدا نطلع على المسرحيه هى بتبتدى 8 و بتخلص على 11.
فارس طيب حلو اوى اهو بعديها نتعشى و على ما نرجع البيت تكون الست ثريا نامت.
نغم خلاص اتفقنا.
فارس اوكى هخرج انا بقى اقعد مع البنات شويه.
نغم فى سرها يادى البنات هو انا مش هخلص منهم.
فارس عاوزه حاجه
نغم لا شكرا.
نغم اوكى.
فى الساعه الخامسه كان حازم فى المطار فى انتظار والدته و بعد حوالى النصف ساعه كانت تخرج من صالة الوصول.
السيده ثريا هى إمرأة فى الخمسين من عمرها و لكنها تتمتع بشباب و حيويه فمن
استقبلها حازم بإحترام و لكن من يرى لقائهما يدرك انهما كالأغراب.
حازم حمدلله على السلامه.
ثريا الله يسلمك.
حازم الرحله كانت كويسه
ثريا اه الحمد لله بس انت عارف الدرجة التانيه مش مريحه اوى.
حازم محاولا كظم غيظه معلش
انتى كنتى مستعجله و ملقتش مكان فى الدرجه الاولى فحجزت فى الثانيه.
ثريا خلاص ادينى جيت مش مشكله.. امال فارس مجاش يستقبلنى ليه.. هو متضايق انى راجعه
حازم فارس فى الشغل.
ثريا هو فارس بيشتغل
حازم اه بيشتغل فى الشركه بتاعتنا.
ثريا و انت معندكش شغل.
حازم لأ انا فى اجازه جواز.
ثريا بدهشه جواز انت اتجوزت
حازم ايوا من يومين اتجوزت نهله بنت عمى.
ثريا بعصبيه اتجوزت بنت فاتن ازاى تعمل حاجه زى دى
حازم دى حياتى و انا حر فيها و بعدين دى بنت عمى مش غريبه.
ثريا ازاى مش غريبه.. جدك كان متبرى منها.
حازم جدى عمره ما اتبرى منها.. دى بس مشاكل كانت بينه و بين عمى.. بس هو قبل ما يموت طلب منى اروحلها و اعرفها و كتب وصيه تجمعنا كلنا ببعض.
ثريا يعنى هو اللى اجبرك تتجوزها
حازم لا طبعا انا اتجوزتها عشان بحبها.
ثريا بتحب بنت فاتن
حازم يييييييي.. ماما ارجوكى دى حياتى و انا حر فيها و لو سمحتى اتفضلى عشان نروح و ارجوكى لما تشوفى مراتى تعامليها كويس.
ثريا طيب يالا بينا.
حازم ماما
ثريا اوكى يا حازم هعاملها كويس هو انا هاكلها يعنى.. يالا عشان انا تعبت من السفر.
حازم اتفضلى اركبى العربيه.
ركبت بجواره و اتجها إلى الفيلا.
الفصل الرابع و الثلاثون
نغم لم تكن تعرف أى مسرحيه تعرض فى المسرح القومى و ما اذا كان الميعاد الذى اخترعته صحيح او لا فأتصلت بالمسرح و تأكدت من ان بالفعل هناك مسرحية تعرض لحسن حظها و أرسلت احد موظفى الشركه ليحجز لهما تذكرتين و فى ميعاد انتهاء العمل مر عليها فارس.
فارس ها جاهزه
نغم اه جاهزه.. يالا.
تحركا و ذهبا ليتناولا الغذاء سويا.
نغم ها احكيلى عملت ايه لما سيبتنى فى المكتب
فارس يعنى هعمل ايه خرجت اكمل شغلى.
نغم كان وراك ايه يعنى
فارس قعدت اتفق مع البنات هيعملوا ايه.. بصراحه جروب ممتاز جدا و ساعدونى اوى.
نغم بغيظ انا بفكر اغيرهم.
فارس لا اوعى دول ممتازين و اتعودت عليهم و بقينا اصحاب.
نغم بعصبيه طيب ممكن نتغدى بقى.
فارس اوكى هتاكلى ايه
نغم اطلبلنا المينيو الاول.
فارس طيب انتى متعصبه كدا لو مش طايقه تخرجى معايا للدرجه دى روحى انتى و انا هروح الحفله.
نغم ايوا هتموت انت و تروح الحفله عشان تهيص فى وسط البنات.
فارس و دا يضايقك فأيه
نغم مش مضايقنى و لا حاجه.. و على العموم انا مقولتش انى متضايقه من خروجنا لكن انت بقى لو مش عاوز تبقى معايا و حابب تروح مع البنات الحلوين اللى هتموت عليهم روح.
فارس يغمز لها لا يا قمر هو فى احلى منك برضه.
خجلت نغم و احمرت وجنتيها و تمنت لو ان فارس يعنى كلامه و لكنها لم تستطع ان تعرف ما اذا كان يعنى ما يقول ام يمزح كعادته. فصمتت و لم تقل شيئا.
فارس ايه ساكته ليه
نغم مفيش بس مش عجبانى تريقتك.
فارس و مين قالك انى بتريق!
نغم مبتتريقش
فارس لا طبعا.
نغم يعنى شايفنى حلوه
فارس و مين الحمار اللى يقول غير كدا.
نغم دا المفروض ان دى طريقتك فى انك تعاكسنى.
فارس ايه معجبتكيش.
نغم طيب و بتعاكسنى ليه
فارس كدا مزاجى.
نغم اهاااااااااا مزاجك.. طيب و افرض ان انا مليش مزاج.
فارس لا ليكى و انا عارف.
نغم متاخدش الم فى نفسك.
فارس اوكى خلاص هقوم اروح للبنات احسن هما مبسوطين بيا و انا واخد الم فى نفسى.
و هم بأن يقف فمسكت يده مسرعة و شدته ليجلس.
فارس مجنونه و الله و ضحكت عليكى.
نغم ازاى
فارس ضاحكا انتى فاكره انى ممكن اقوم قبل ما اتغدى.
نغم بعصبيه سخيف.
ضحك فارس عليها فهو يشعر بما تكنه له من مشاعر فيتعمد اغاظتها لتظهر مشاعرها بوضوح.
بعدما غادر حازم ليحضر والدته حدثت نهله والدتها فى التليفون.
نهله ازيك يا ماما و خالتو عامله ايه
فاتن الحمد لله يا حبيبتى احنا كويسين.. طمنينى عليكى انتى عامله ايه و حازم عامل ايه
نهله الحمد لله احنا كويسين و حازم راح يجيب مامته دلوقتى.
فاتن هى ثريا جايه النهارده.
نهله ايوا زمانها وصلت.
فاتن طيب يا حبيبتى خلى بالك منها عشان الست دى مش سهله و اول ما تعرف انتى مين الله اعلم هتتصرف معاكى ازاى.
نهله نفسى اعرف كلكم قلقانين منها ليه هتعملى ايه يعنى انا هعاملها كويس و انا فى حالى و هى فى حالها.
فاتن ثريا عمرها مبتبقى فى حالها و انتى بالذات مش هتسيبك فى حالك.
نهله ليه يعنى
فى هذا الوقت دق باب غرفة نهله.
نهله ثوانى يا ماما عشان فى حد بيخبط على الباب.
فاتن طيب يا حبيبتى براحتك.
قامت نهله لتفتح فوجدت ندى على الباب.
نهله اهلا ندوش انتوا جيتوا
ندى انا بس اللى جيت نغم و فارس مجوش. هو حازم مش موجود
نهله لا راح يجيب مامته.
ندى طيب انتى بتعملى حاجه و لا هتنزلى تتغدى معايا
نهله كنت بكلم ماما استنينى ثوانى هقفل معاها.
ندى اوكى سلميلى عليها.
انهت نهله مكالمتها مع والدتها و عادت لندى.
نهله بصى حازم و مامته اكيد على وصول لو مش جعانه اوى خلينا نستناهم عشان ميصحش ييجوا يتغدوا لوحدهم.
ندى خلاص هشرب عصير و نستناهم.
و نزلا لينتظراهما فى الاسفل و يدردشا قليلا.
نهله فارس و نغم مجوش ليه وراهم شغل
ندى لا قالوا هيخرجوا سوا.
نهله دا ايه التطور دا نغم و فارس يخرجوا مع بعض من غير قوات فصل
ندى و الله اللى باين ان بقالهم فتره منسجمين مع بعض.
نهله انا كمان ملاحظه كدا.. شكل غلاستهم على بعض دى بيخبوا بيها حاجه.
ندى مبتسمه فعلا.
نهله على العموم هما لايقين على بعض و مجانين زى بعض.
فى هذا الوقت فتح باب الفيلا و دخل حازم و معه والدته شعرت نهله بقلق و خوف بمجرد ان رأت والدته لا تعرف سببه و لكن ربما يكون كلام حازم و والدتها الذى جعلها ترهب مقابلة هذه السيده. توجهت ندى و نهله اليهما ليرحبا بها و اخذ حازم يعرفها عليهما.
حازم ماما دى ندى فاكراها.
ثريا اه فاكراها كبرتى يا ندى و زى ما انتى حلوه و زى القمر.
ندى و هى تسلم عليها ميرسى يا طنط حضرتك كمان حلوه زى ما انتى.
ثريا بسعاده لهذا الاطراء ميرسى يا حبيبتى كلك ذوق.
اقترب حازم من نهله و لم تعرف نهله هل تصرف هكذا لأنه افتقدها ام اراد ان يحميها من امه التى اخذت تنظر لها نظرات ناريه.
حازم و القمر دى بقى تبقى نهله مراتى.
ثريا بطريقه رسميه اهلا.
نهله اهلا بيكى.. نورتى.
ثريا ميرسى.
نظر لها حازم بعتاب قائلا مش يالا ندخل عشان نقعد.
وشوشت نهله حازم قائله روحوا انتوا و انا
حازم ماشى يا قلبى.
و بعد دقائق عادت لتدعوهم لطاولة الغذاء.
ثريا امال فارس فين
نهله مبتسمة لها بأدب فارس خرج هو و نغم.
ثريا متجاهله نهله و موجهه كلامها لحازم هى مش نغم دى بنت عمك اللى كانت عايشه فى امريكا
حازم ايوا بس رجعت.
ثريا ااااه.. و هو كل واحد فيكم بقى واخدله بنت عم.
شعرت نهله و كأن احد سكب مياه بارده فوق رأسها.. نظر لها حازم و شعر بما تشعر به.
حازم مش ناكل احسن يا
