رواية الغريبة بقلم مروة كاملة
يرى نغم احلى منها و رده جعلها تشعر بحزن كبير و شعرت انها مهما اهتمت بنفسها لن يروها جميله.
خرجت مع فارس حيث اخذها إلى مكان جميل على النيل ملئ بالخضره و الاشجار على النيل مباشرة و الشمس كانت تنعكس على سطح مياه النيل ثم بدأت الشمس تغرب و كأنها تنزل فى احضان مياه النيل كان ظل الشمس على مياه النيل و هى تغرب يعطى اشكال بدأت نهله تخيلها كما اوحي لها خيالها كما قام فارس بإلتقاط الكثير من الصور.
عند حلول الليل جمعا اشيائهما
فارس هتحتاجى تيجى اد ايه تانى
نهله يعنى ممكن مرتين كمان. انا رسمت جزء كبير و ممكن مرتين كمان اخلص الحاجات الاساسيه و الباقى ابقى اكمله فى البيت.
فارس طيب كويس. هتعلمى ايه بكره فى السهره مع حازم
نهله هعمل ايه يعنى
فارس هتلبسى من لبس السواريه اللى جبناه و اكيد هتلبسى كعب عالى.
نهله ااااااااايه
فارس اه طبعا.. انتى رايحه سهره هتلبسى كوتشى يعنى و لا ايه
نهله طيب اعمل ايه انا مش بحب الكعب و مش بعرف امشى فيه.
فارس مقدامكيش غير انك تلبسيه النهارده و بكره طول اليوم و انتى فى الفيلا لحد ما تتعودى عليه عشان بكره تعرفى تلبسيه. و متخافيش انتى معظم الوقت هتبقى قاعده يعنى يا اما فى العربيه يا اما قاعده فى المطعم.
نهله خلاص هحاول.
فارس و هنخلى ندى تحطلك الميك اب.
نهله اوكى.
عادا إلى المنزل و جلست نهله مع حازم ليشرح لها كل شئ له علاقة بعمل الغد. تركته سريعا لتصعد لفارس و ندى ليدرباها على لبس الاحذيه عالية الكعب.
مرت على غرفة ندى فوجدتها جالسة على اللابتوب تقرأ شئ.
نهله بتعملى ايه
ندى بقرأ روايه ادهم بعتهالى.
نهله ييييييييييييييي على ادهم.
ندى حرام عليكى دى روياته جميله.
نهله طيب مش هتعلمينى انتى و فارس البس الجزمه اللى بكعب
ندى دى حاجه مش محتاجه تعليم بصى روحى البسى جزمه بكعب من اللى جيبتوهم امبارح و هاتى فارس و تعالوا.
نهله اوكى.
ذهبت إلى غرفتها و لبست احد الاحذيه عالية الكعب و ذهبت بصعوبه به إلى غرفة فارس و اخذته و ذهبا لندى.
سهر الثلاثه سويا يضحكون و يمزحون و ظلت نهله تحاول التحرك بهذا الحذاء فى ارجاء حجرة ندى و كانا فارس و ندى يساعداها و يضحكون جميعهم على المواقف التى تتعرض لها نهله و هى تحاول التحرك بالكعب العالى.
الفصل الرابع عشر
استيقظت نهله فى السابعة كعادتها و ايقظت فارس و نزلا إلى الحديقه لتكمل نهله عملها و يصورها فارس ثم انتهت من عملها و عادت إلى غرفتها و إرتدت فستان رقيق من الجينز و ارتدت صندل احمر عالى الكعب فقد عادت لمهمة التعود على الكعب العالى و للحق كانت افضل كثيرا من مساء امس فقد اعتادت عليه بعض الشئ. كانت تبدو جميلة و واثقة من نفسها.
ايقظت ندى و نزلا لتناول الفطور مع البقيه.
نهله سهرتى برضو تقرى قصص ادهم بيه
ندى اه. و اتكلمنا على الماسنجر شويه عشان اقوله رأيى.
نهله طيب ربنا يصبرك عليه.
ندى انتى ليه بس حاطه نقرك من نقره.
نهله انا و ادهم متربيين مع بعض من صغرنا و كنا كدا على طول. و ماما و خالتو كانوا بيقعدوا يزعقولنا و يقولولنا هو انتوا مولودين فوق روس بعض. بس ميغركيش غلاستنا على بعض دى بس ادهم اخويا الكبير و صاحبى جدا و متعودين نحكي لبعض كل حاجه.
ندى ربنا يخليكوا لبعض. ياللا مدى شويه كلهم مستنينا.
نهله مقدرش اوعدك دا اقصى اداء ليا بالكعب.
ندى اه صحيح. لا خلاص امشى براحتك. مش هيجرالهم حاجه لما يستنوا ثوانى.
جلسا على طوالة الغذاء مع الجميع.
نهله احنا المفروض ميعادنا الساعه كام يا حازم.
حازم 8 بس هنمشى من هنا على 7 عشان لو كان فى زحمه منتأخرش.
ندى و انا كمان هنزل اجيب حاجات ليا و لنهله.
نغم هبقى اجى معاكى لأن انا كمان محتاجه حاجات.
فارس يعنى انا اللى هقعد احرس البيت خلاص اكلم انا كمان الشباب و نقضيها بقى.
نهله بقلق هتخرجوا امتى
ندى متقلقيش مش هنخرج قبلك.
نهله اه ربنا يخليكم متسيبونيش احتاس لواحدى.
فارس متخافيش هنستنى نحتاس معاكى.
نهله لو كدا ماشى.
انهوا طعامهم ثم صعدا ندى و فارس مع نهله إلى غرفتها.
نهله اهو الدولاب قدامكم فيه كل اللبس اللى جبته شوفولى بقى البس ايه.
ندى احنا مش محتاجين بس غير السواريهات.
فارس متتعبيش نفسك هو فستان واحد و الباقى بدل و تاييرات هى كانت عاوزه حاجات كلها مقفوله و فستان واحد بس اللى لاقيناه بالمواصفات دى.
ندى مش مشكله هى مش هتروح حفلات يعنى دا هى معظم سهراتها هتبقى سهرات عمل يعنى محتاجه حاجه سواريه او فورمال. طيب بصوا التايير دا كدا متهيئلى مناسب.
فارس ورينى... اه فعلا مناسب. ايه رأيك يا نهله
نهله انا اصلا كلهم عاجبنى فمش هتفرق معايا البس ايه النهارده كلهم هيتلبسوا.
ندى طيب دلوقتى نختار الشوز و الشنطه.
انتقت نهله الحذاء و الشنطه.
نهله الجزمه دى و شنطتها لان كعب الجزمه اقل كعب فى اللى جيبناهم.
ندى حلوه و كعبها معقول.
فارس طيب بالنسبه لشعرها و الميك اب كلميلها الكوافيره تيجى تعملها الحاجات دى.
ندى لا الموضوع مش محتاج كوافيره هى اصلا شعرها محتاج تظبيط بسيط و الميك اب انا هعملهولها. نهله احلى حاجه فيها انها تبان طبيعيه.
نهله انا اصلا بصراحه مبستحملش الكوافيرات و بعدين هتعملى ميك اب للسهره جامد و انا بحب الميك اب يبقى سيمبل.
ندى خلاص انا هعملك اللى انتى عاوزاه.
نهله انا تعباكى معايا جامد و كمان بعد كدا هتنزلى تجيبيلى الميك اب.
ندى و ايه التعب يعنى فى كدا. متفكريش فى الكلام دا انا كدا و لا كدا محتاجه اجيب
حاجات.
تركهما فارس لتنهيا عملهما على راحتهما. ساعدتها ندى فى عمل شعرها و وضعت لها الميك أب ثم تركتها لترتدى ملابسها.
بعد نصف ساعه طرق فارس و ندى باب غرفة نهله التى كانت انتهت من ارتداء ملابسها و اصبحت جاهزة تماما.
فتحت نهله باب غرفتها.
فارس و هو يصفر ايه يا بنتى الجمال دا كله.
ندى ما شاء الله طالعه زى القمر.
نهله بجد شكلى حلو.
فارس مززززه.
نهله يا ابنى بطل الكلمه دى بقى.
ندى و الله زى القمر.
فارس متخافيش و الله كل حاجه تمام بس ياللا ننزل بسرعه عشان الساعه بقت 7 خلاص و حازم مبيحبش التأخير.
نزلوا إلى الردهه ليجدوا حازم و نغم يجلسان هناك و يتحدثان. احست نهله بغضب لم تعرف سببه عندما رأتهما معا و لكن قررت ان تخفيه و لا تجعل احد يلحظه.
اقتربوا منهم فتنبه حازم و نظر ليفاجأ بشكل نهله هل هذه الفتاه الجميله الانيقه الواثقه من نفسها هى نفسها تلك البنت التى احضرها من المنصوره منذ ايام قليله. هل كل هذا الجمال اخفته نظاره و بعض الملابس القديمه و الغريبه. هذه الفتاه تبهره يوما عن الاخر. كان يريد ان يعبر عن اعجابه بمظهرها و لكن لم تسعفه الكلمات لا يعرف لماذا
حازم جاهزه يا نهله
كان سؤال حازم محبط كثير لنهله فقد توقعت ان يعبر عن رأيه و ان يشجعها بأى كلمات حتى لو كانت بسيطه كما فعل فارس و ندى.
فارس ايه يا عم هو دا اللى ربنا قدرك عليه جاهزه يا نهله . انت مبقتش بتشوف و لا ايه يا كبير. البنت زى القمر قدامك و خارجه معاك يا ريتنى كنت مكانك و انا كنت خرجت معاها و فضلت اتعايق بيها قدام اصحابى و اغيظهم.
حازم عشان هايف بس انا بشوف نهله على طول حلوه.
نغم بس نهله النهارده تجنن بصراحه. طالعه حلوه اوى النهارده يا نهله.
نهله شكرا.
فارس دى حتى البرنسيسه رضيت عننا النهارده و قالت كلمتين عدليين على غير العاده.
نغم انا صريحه بس انتوا اللى مبتقدروش صراحتى.
فارس فى فرق بين الصراحه و الوقاحه.
نغم احترم نفسك.
حازم يييييييييييي انتوا الاتنين. ياللا يا نهله نمشى احنا.
نهله ياللا.
و تحركت نهله مع حازم.
ضربت ندى فارس على كتفه و همست له قائله زودتها اوى مع نغم.
فارس تستاهل.
ندى بس هى المره دى معملتش حاجه بالعكس كانت بتحاول تبقى كويسه مع نهله.
فارس معرفش بقى اهو اللى حصل.
ركبت نهله السياره بجوار حازم الذى أدار المسجل على اغنية كلمات لماجده الرومى و هى اغنية تعشقها نهله. فأغمضت عينيها و ارجعت رأسها إلى الوراء و سرحت مع الأغنيه. كان حازم يختلس النظر إليها من وقت لأخر و كان يفكر كيف تشعره هذه الفتاه فى بعض الاحيان انها رقيقة و حالمه و فى احيان اخرى يشعر أنها قوية و ابعد ما تكون عن الرقه و ربما تكون هى الاثنين مجتمعين فهى كمحارة البحر قوية من الخارج و بداخلها كائن رقيق و ضعيف. احتار كثيرا لماذا تشغل هذه الفتاه تفكيره بهذا الشكل و لماذا يفكر الف مره قبل ان يقول لها اى كلمه فهو يخاف ان يزعجها و يخاف ان يبدو ضعيفا امامها و يخاف ان يبدو قاسيا او قويا بدرجة زائدة. لا يعلم سبب ذلك و لكنه بالتأكيد يحترمها و يقدرها و تعجبه شخصيتها.
انتهت الأغنيه ففتحت عيونها و اعتدلت فى جلستها.
حازم نمتى
ابتسمت له نهله و ردت لا بس انا بحب الاغنيه دى فسرحت معاها.
حازم بتفكرك بحد
نهله بدهشه ليه بتقول كدا
حازم لأنها اغنية رومانسيه فقولت يمكن ليها ذكريات معاكى.
نهله لا خالص. صعب يكون ليها ذكريات معايا لأن مبقاش فى راجل ممكن يكون رومانسى للدرجه دى. الاغنيه دى مفيش بنت مبتحبهاش بس مش معنى كدا ان يكون ليهم ذكريات معاها.
حازم انتى بقى من البنات اللى بتشوف ان الراجل كائن معندوش مشاعر و مبيحسش.
نهله يعنى مش بالظبط. بس الظروف دلوقتى خلت الناس بشكل عام مبتهتمش بالمشاعر.
حازم ازاى يعنى
نهله الكل يا بيفكر فى دراسه يا اما شغل و كل الناس بتحاول تثبت نفسها يعنى التفكير بقى عملى اكتر مبقاش زى زمان. دلوقتى فى ناس كتير عندها استعداد ان هى تبنى مستقبلها و شغلها و حياتها على حساب ان يكون عندها اسره.
حازم و انتى من الناس دى
نهله لا.. انا بيهمنى شغلى جدا و مستقبلى بس فى نفس الوقت انا اكتر واحده عارفه قيمة الاسره و نفسى ان يبقى ليا اسره بس لما ادخل على عيله جديده لازم يكونوا بيحترمونى و يبعاملونى على انى منهم يا اما ميلزمونيش.
فهم حازم انها مازالت تتألم لما حدث مع والدتها و ان لذلك تأثيره الكبير على وجهة نظرها هذه.
حازم عندك حق طبعا بس اطمنى تماما من الناحيه دى لأن أى حد هيتعامل معاكى لازم هيحترمك و يقدرك.
نهله طيب و انت مقولتليش الاغنيه دى ليها ذكريات معاك
حازم اها.
قالها بصراحه و اقتضاب صادمين كانت تتمنى لو وضح اكتر من ذلك و لكنه التزم الصمت و بعد ثوانى قال خلاص وصلنا.. مستعده
هزت نهله رأسها بالموافقه.
دخلا المطعم و فوجأ حازم ان الذى ينتظرهم ليس الحاج عبد الفتاح تاجر القماش و لكن شاب فى مثل عمر حازم تقريبا وسيم و يبدو عليه الخبره و الثقه بالنفس.
حازم مساء الخير. انا حازم كان ميعادى مع الحاج عبد الفتاح.
الشاب مساء الخير يا استاذ حازم. أنا احمد ابنه و انا اللى بقوم بكل الاتفاقيات اللى تخصنا.
حازم تمام مفيش مشكله.
نظر احمد لنهله و ابتسم لها ثم قال موجها كلامه لحازم معرفتنيش بالأنسه.
حازم نهله بنت عمى و المسئوله عن تعاملات الشركه الخارجيه و كل صفقاتنا.
احمد اهلا انسه نهله.. يعنى كدا افهم انى لازم انول رضاكى النهارده.
لم تعجب حازم طريقة كلام احمد و هم بأن يرد عليه لكن سبقته نهله بالرد.
نهله المهم نوصل لاتفاقيه ترضى جميع الاطراف يا استاذ احمد.
احمد و نظرة الاعجاب واضحه عليه دى حاجه انا مش قلقان منها.
حازم طيب هنفضل واقفين كتير.
جلسوا سويا و بدأ الحوار عن العمل. عرض احمد سعر للقماش الذى طلبوه رفضه حازم و شعر انهم يبالغوا فى السعر.
حازم السعر كدا عالى اوى.
احمد بس متنساش انك مش هتلاقى القماشات دى عند اى تاجر تانى.
حازم بس دا مش معناه ان الاسعار يكون فيها استغلال.
احمد دا مش استغلال بس انا كتاجر بقدم سلعه نادره ليا حق انى استفيد ببعض الفوائد.
نهله اسمحلى يا استاذ احمد تعاملك فى حد ذاته مع شركتنا فائده كبيره ليك و اكيد حضرتك عارف اسم شركتنا فى السوق حجمه أد أيه و مجرد وجود اسم شركتنا ضمن الشركات اللى بتتعامل معاها و حضرتك بتقدم عرض لشركه حابب تتعامل معاها دا فائده كبيره اوى ليك.
احمد ايوا بس ....
نهله مقاطعة أحمد معلش يا استاذ احمد انا لسه مكملتش كلامى انا سمعتك للاخر ادينى فرصتى اتكلم انا كمان.
احمد مبتسما انا اسف. اتفضلى كملى.
نهله العرض اللى حضرتك بتقدمهولنا دا ميفرقش ابدا عن التكاليف اللى ممكن نتكلفها لو استوردنا القماش و طبعا دا هيكون افضل لينا طالما الاسعار واحده و لا ايه رأيك
احمد بنت عمك شاطره اوى يا استاذ حاتم. انسه نهله انا موافق على عرضكم بس معترض على حاجه واحده بس.
نهله و ايه هى
احمد كلمة حضرتك اللى كل شويه بتقوليها.
نهله معلش يا استاذ احمد احنا فى شغل و لازم التعامل يكون رسمى.
احمد بس احنا دلوقتى خلصنا شغل و ممكن نطلب العشاء.
حازم بغيظ اه يا ريت نطلب العشاء بسرعه عشان لازم نمشى بدرى.
احمد اه طبعا اكيد.
طلبوا العشاء و كان احمد يحاول ان يلفت نظر نهله بتعليقاته و مزحه طوال الوقت مما اغضب حازم كثيرا و تمنى لو تنتهى هذه السهره فى الحال.
بعد انتهائهم من تناول العشاء استاذن حازم ليعودوا إلى الفيلا.
حازم كدا نبقى اتفقنا يا استاذ احمد و احنا دلوقتى هنستأذنك لازم نمشى.
احمد انا سعيد جدا بالمقابله دى. و سعيد انى اتعرفت على واحده زى الانسه نهله و ان شاء الله نتعرف على بعض اكتر. يا ريت بس لو اخد موبايل الانسه نهله عشان لو محتاجين نناقش حاجه بخصوص الشغل.
حازم بعصبيه
احمد ليه.
نهله استاذ احمد الموبايل دا تليفون شخصى و انا بعد مواعيد الشركه بتفرغ لحياتى الشخصيه و مبتكلمش فى اى حاجه ليها علاقه بالشغل. فلو حضرتك عاوز تكلمنى تقدر تتكلم على تليفونات الشركه.
احس حازم بالرضا من ردها.
حازم على العموم اتفضل دا كارتى فى كل ارقامى و لو حابب تناقش اى حاجه ممكن تكلمنى فى اى وقت. و دلوقتى بعد اذنك لازم نمشى.
غادرا حازم و نهله المطعم و توجها إلى السياره.
حازم برافو عليكى واضح انك ذاكرتى الموضوع كويس. ردك عليه مخلهوش يعرف يفتح بقه.
نهله يعنى كنت كويسه
حازم جدا.. اول مره احس انى ممكن اعتمد على حد فى الشغل و اثق فيه. انتى فهمتى الشغل بسرعه و ان شاء الله مش هتلاقى اى صعوبه لما تنزلى الشركه.
نهله البركه فيك. انت اللى فهمتنى كل حاجه.
حازم لا انتى مخك نظيف و مجتهده و لما بتعملى حاجه بتخلصيلها. انتى مبقالكيش غير كام يوم و ما شاء الله عملتى حاجات كتير. جدو لو كان عايش كان هيعرف أد ايه انتى شاطره و انه غلط جامد انه بعدك عنه و عننا السنين اللى فاتت.
نهله بلاش السيره دى لو سمحت.
حازم انا فاهمك و مقدر مشاعرك.
عادا حازم و نهله إلى المنزل. دخلا الردهه فلم يجدا احد بالاسفل.
حازم شكل البنات فوق و اكيد فارس طالما خرج مع اصحابه هيكون لسه مرجعش.
نهله طيب انا هطلع بقى لندى شويه و بعدين انام.
حازم انا اتبسطت اوى بشغلنا مع بعض النهارده و مبسوط ان طلع
ليا بنت عم زيك جميله و مثقفه و فاهمه الحياه كويس.
شعرت نهله بسعاده كبيره لكلام حازم و مدحه لها. ابتسمت له قائلة شكرا. تصبح على خير.
حازم و انتى من اهله.
صعدت نهله لغرفة ندى فوجدتها تحدث ادهم بالصوت على الماسنجر.
نهله ايه يا استاذ ادهم ناوى تجنن البنت بكتاباتك. اطلع من دماغها و لا اكمنها ذوق و مبتعرفش تحرج حد هتسوق فيها.
ندى ايه يا نهله اللى بتقوليه دا هو انا اشتكيتلك بالعكس انا مبسوطه.
ادهم يااااااه فى ناس اتكبست على الاخر دلوقتى و متهيألى تخلع احسن.
نهله براحتك انا عاوزه مصلحتك.
ندى على فكره جيبتلك الحاجه فى أوضتك.
نهله طيب مش هتيجى احكيلك عملت ايه النهارده.
ادهم ما تسيبيها يا غلسه و تروحى تنامى انتى من امتى بتسهرى.
نهله و انت مالك متتدخلش بينى و بين قريبتى انت اصلا مالك بيها.
ندى معلش يا ادهم هروح اتكلم مع نهله شويه قبل ما تنام و هرجع اكلمك و اقولك رأيى فى الشعر اللى بعتهولى.. كدا و لا كدا احنا بنسهر بس هى اكيد عاوزه تنام عشان بتصحى بدرى.
ادهم خلاص مستنيكى.
اغلقت ندى الماسنجر و ذهبت مع نهله إلى غرفتها لتريها ما اشترته لها من الميك اب و يتحدثا سويا. اعجبت نهله بالميك اب كثيرا.
حكت نهله لندى كل شئ حدث منذ خروجها و كيف انها اثبتت نجاحها اليوم.
نهله هو حازم كان خاطب او مرتبط ببنت
ندى لا حازم عمره ما خطب بس بصراحه معرفش لو كان فى بنت حبها و لا لا لأن حازم بيحب يكون عنده خصوصيه و مش بيتكلم عن مشاعره ابدا. اشمعنى
نهله مفيش اصل لما شغل اغنية كلمات و لما اتكلمنا عنها قالى انها بتفكره بحد.
حركت ندى رأسها و يدها بمعنى انها لا تعرف.
ندى ياللا بقى انا هروح اكلم ادهم و انتى نامى.
نهله بضحكه خبيثه هى ايه حكاية ادهم
ندى بإضطراب هتكون ايه حكايته يعنى. انا بس عجبتنى كتاباته.
نهله ااااااااااااه كتاباته. اوكى روحى اقرى كتاباته.
ندى تصبحى على خير.
نهله و انتى من اهله.
و كعادتها كلمت والدتها و نامت.
الفصل الخامس عشر
عادت ندى إلى غرفتها لتتحدث مع ادهم. فتحت اللابتوب و وضعت السماعات و بدأت الحديث معه.
ندى معلش يا ادهم اتاخرت عليك.
ادهم و لا يهمك.. استناكى.
ابتسمت ندى و ارسلت له على الماسنجر وجه مبتسم.
ندى قريت الشعر اللى بعتهولى اسلوبك رائع و احساسك بيوصل للقلب. مشاعرك الصادقه بتوصل للقارئ فبيحس انك بتكتب عنه.
ادهم محدش قالى الكلام دا غيرك قبل كدا.
ندى يبقى مبيفهموش.
ادهم لا هما مش كلهم قمر زيك و حساسين زيك.
ندى انا بتكلم جد.
ادهم و انا و الله بتكلم جد.
ندى طيب حاولت تعرض رواياتك على ناشر.
ادهم حاولت بس للأسف الموضوع محتاج يكون ليا معارف عشان يسهلولى انى اقابل الناشر.
ندى دى بسيطه.
ادهم ازاى يعنى
ندى انا اعرف ناس ممكن يعرفوك على ناشريين. بس اللى اهم من دا انت مسجل كتاباتك فى الشهر الى.
ادهم لا.
ندى بس كدا ممكن لو اى ناشر او ناقد معندوش ضمير و قراهم و عجبوه يسرقهم.
ادهم مش للدرجه دى يعنى.
ندى للدرجه دى و نص كمان متستقلش بنفسك.
ادهم مش شايف انى كاتب حاجه عبقريه للدرجه دى. و مش هروح اسجلهم مخصوص يعنى و اقف فى زحمه و طوابير و اصلا عمر ما حد هيعبرنى و ينشرهم.
ندى لا اول حاجه هنعملها هنروح نسجلهم فى الشهر الى.
ادهم طيب و ال ن بتاعت الجمع دى معناها انك بتفكرى تيجى معايا.
ندى بخجل يعنى لو دا ميضايقكش.
ادهم يضايقنى.. ال يضايقنى ال.. دا يوم المنى.
ندى هههههههههههههههه
ادهم و الله ما سمعت فى حياتى احلى من الضحكه دى.
ندى بعتاب ادهم.. انا مش واحده من اللى بيجروا وراك فى الجامعه.
ادهم انا عمرى ما شوفتك كدا.. انتى متجريش ورا حد ابدا.. انتى اللى ينول رضاكى تبقى امه دعياله.
ندى كاتب ودى شغلتك الكلام.
ادهم عمرى ما قولت او كتبت حاجه مش حاسسها. اسألى قلبك و شوفى هيقولك انى صادق و لا لا... ها سألتيه
ندى ايوا.
ادهم و قالك ايه
ندى مردش خالص.
ادهم طيب بعد أذنك دقيقه.
ندى بإستغراب اتفضل.
عاد ادهم بعد حوالى 5 دقائق.
ادهم معايا.
ندى ايوا.
ادهم اسف انى اتأخرت عليكى.
ندى لا عادى مفيش مشكله.
ادهم اصلى كتبت حاجه دلوقتى هبعتهالك و عاوزك تقريها و تقوليلى رأيك فيها.
ندى ايوا كدا سيبك من الهزار و خلينا ندخل فى الجد.
ادهم بالظبط هو دا الجد.
ارسل لها ادهم ملف فتحته لتجد فيه هذه الكلمات
ظهرت لى فجأة
كنجمة فى السماء ظهرت بغتة
انارت ليلى الطويل المظلم
امحت كل عذابى المؤلم
اسرت قلبى و احلامى
بكلمات كتبتها فى لقاء الكترونى
هل يعقل ان اقع فى الحب فى يومين
هل تصدق انى عشقتها من حديث يومين
قابلتها فى عصر السرعه
فلم على قلبى ان ينتظر مدة
اجبنى يا قلبى هل وجدت لك قلب حبيب
و هل وجدت لى الرفيق القريب
هى تفهمنى كما لم يفهمنى احد
تساعدنى كما لم يساعدنى احد
عشقتها بيومين
نعم عشقتها
فهل ستقبل عشقى
سأضع قلبى بين يديها
و لها القرار
اما تقبله او ترفضه
و تتركه كطفل شرد و ضل الطريق
ارؤفى بحالى يا جميلتى
و سلمى لى قلبك و خذى قلبى بين اضلاعك
اوعدكى ان ارعى قلبك و الا افرط فى حبك
لا تخافى من عجلتى
فلا اريد ان تمضى لحظة دون ان اقول احبك
فتكون كسنوات ضاعت من عمرنا.
قرأت ندى كلماته و دمعت عيونها
قطع عليها افكارها صوت ادهم.
ادهم كل دا بتقرى.
ندى لا خلصت.
ادهم و ساكته ليه
ندى مش عارفه اقول ايه.
ادهم كلامى ضايقك.
ندى لا بس معرفش خوفت ليه.
ادهم احساسك مختلف عن احساسى.
ندى السرعه هى اللى مخوفانى.
ادهم ليه
ندى الحاجه اللى بتبتدى بسرعه بتنتهى بنفس السرعه.
ادهم فى ايدنا نخليها تستمر.
ندى مش عارفه.. ايه اللى مخليك واثق
ادهم لأنى اول مره احس باللى انا حاسه معاكى.
ندى بس ملحقناش.
ادهم المشاعر ملهاش كتالوج لازم تمشى عليه و القلب ملوش قوانين تحكمه.
ندى خايفه و محتاجه افكر.
ادهم و انا مش مستعجلك خدى وقتك.
ندى خلينا نشوف الايام مخبيالنا ايه.
ادهم كل خير ان شاء الله بس انتى افتحى الطريق لقلبك.
ندى ان شاء الله.
ظلا يتحدثا طوال الليل حتى طلع النهار. كانت الساعه السابعه و النصف عندما مرت نهله بجوار غرفة ندى و سمعت صوتها تتحدث. طرقت الباب فسمحت لها ندى بالدخول.
نهله يا نهار ابيض انتى كل دا لسه بتتكلمى مع ادهم و منمتيش.
ندى خدنا الكلام شويه.
نهله شوية ايه دا انتوا بقالكم اكتر من 8 ساعات. شيلى السماعه دى خلى البيه يسمعنى و شغليلى الكاميرا.
نفذت ندى طلب نهله.
نهله انت يا بيه.
ادهم يا فتاح يا عليم يا رزاق يا كريم.
نهله افتح الكام خلينى اشوف وشك.
فتح ادهم الكاميرا و نظر لندى و ابتسم كأنه لم يرى نهله.
ادهم عاوزه ايه يا هادمة اللذات و مفرقة الجماعات.
نهله قاعد ترغيلى طول الليل و منمتش.
ادهم و انتى مالك هو انتى كنتى مسئوله عنى
نهله لا يا ظريف بس انت مسئول عن الارض بتاعتى. و بعدين مش حرام عليك مسهر البنت طول الليل جنبك انت و قصصك.
ادهم بالنسبه لأرضك فانا اصلا مليش دعوه بيها انا مهندس و فناااااااااااااان افهميها بقى و بعدين عم محمد متولى كل حاجه و انا بس براجع الحسابات اخر الليل. و بالنسبه للبنت فهى مبسوطه اطلعى منها انتى يا رخمه.
نهله انا رخمه يا ادهم
ادهم ايوا و زودتيها و اطلعى من دماغى.
نهله موجهة كلامها لندى و انتى مبسوطه.
نظرت ندى لأدهم و ابتسمت بخجل.
نهله لا كدا يبقى اطلع منها فعلا.. شكرا يا استاذ ادهم.. انا اتسندت على حيطه مايله.
ادهم العفو.. شوفيلك بقى حيطه معدوله عشان انا زهقت منك و من الارض بتاعتك.
نهله ماشى يا ادهم.
شعر ان نهله تضايقت فعلا و اصبح الموضوع جد.
ادهم نهول متزعليش انتى عارفه انى مليش فى موضوع الارض دا و اتخنقت انتى ادرى واحده بظروفى.. انا ميرضينيش زعلك بس و الله ارضك فى ايد امينه و انا بتابع معاهم على طول.. و انتى عارفه ان عم محمد احسن منى ميت مره.. و حياتى عندك متزعليش.
نهله انا مش زعلانه عشان الارض.. بس انت شايف بتكلمنى ازاى.. احنا مش مع بعض دلوقتى عشان نقضيها غلاسه على بعض و انت عارف انك اخويا و مليش غيرك.
ندى يا سلام يعنى عشان تحسسيه بالذنب تبيعينا احنا.
نهله لا بس بتدلع عليه شويه. اصله حساس حبتين و لما بيزعل حد ضميره بيأنبه.. عارفه هو رغم انه بيغلس عليا على طول و بيناقر فيا بس مفيش لا اطيب و لا اصدق من قلبه.
ادهم و هو ينظر لندى سامعه.
خجلت ندى و احمر وجهها. فضحكت نهله و غمزت لأدهم. فهى تشعر بما يدور بين ندى و أدهم.
نهله طيب ياللا انا هسيبكم دلوقتى عشان فارس زمانه مستنينى عشان نشتغل فى الجنينه و انتوا كفايه رغى و ادخلوا ناموا.
تركتهم نهله و خرجت من الغرفه.
ادهم احسن حاجه عملتها نهله انها خلتك تشغلى الكام.
ضحكت ندى بخجل طيب مش كفايه كلام بقى و ننام عشان سهرنا اوى.
ادهم امرك يا قمر.
ندى تصبح على خير.
ادهم و انتى بخير و سعاده.
مر اليومان التاليان على نفس الوتيره كانت نهله تعمل فى الحديقه صباحا ثم تذهب مع فارس للرسم و التصوير ثم تعود لتدرس بعض الاعمال مع حازم. و كانا ادهم و ندى يواصلا حديثهما على الماسنجر ليلا و حتى شروق الشمس يوميا. و كل يوم تتوطد علاقتهما عن اليوم الذى يسبقه.
فى الليلة التى تسبق أول نهار عمل فى الشركه كانت نهله تجلس مع فارس فى الحديقه.
فارس كدا انا خلصت تصوير و اعتقد ان انتى كمان الملامح الاساسيه للوحه بقت واضحه عندك و تقدرى تكمليها من خيالك.
نهله اه خلاص فاضلها رطوش بسيطه و بعض الالوان اللى عاوزه ادخلها بس خلاص مش محتاجه اروح هناك تانى ممكن اكمل هنا فى البيت.
فارس طيب كويس اوى. انا كمان هبتدى بقى اشوف ايه الصور اللى هختارها و اعمل عليها التأثيرات و اجهزها.
نهله فى مكان جديد فى بالك
فارس ايوا هنبتدى نروحه من الاسبوع الجاى ان شاء الله.
نهله ان شاء الله.
فارس انا هطلع اوضتى بقى اشتغل فى الصور و اقعد على الفيسبوك شويه. انتى مش طالعه
نهله لا اطلع انت انا هقعد هنا شويه.
جلست نهله وحيدة تفكر فيما حدث معها خلال هذا الاسبوع و كيف تغيرت فى هذه الايام القليله و تقبلت هذا المكان الجديد و عائلة لم تعرفها من قبل.
بعد قليل اقترب حازم منها و جلس إلى جوارها.
حازم قاعده لوحدك ليه
نهله بفكر.
حازم قلقانه من بكره
نهله شويه.
حازم متقلقيش من حاجه.. انتى دلوقتى فاهمه كل حاجه عن الشغل تقريبا.. و انا هبقى جنبك على طول.
ابتسمت له نهله.
حازم بكره ان شاء الله هنمشى من هنا الساعه 8 و هتيجى معايا بعربيتى.
نهله اوكى.
حازم فى حاجه تانيه مضايقاكى. ليه مش بتشاركى حد فى مشاعرك.
نهله مش انا بس انت كمان زيى.
حازم انا بس اتعودت مشيلش حد همى و محسسهمش انى ببقى ضعيف احيانا عشان بيعتمدوا عليا دايما.
نهله بس انا معتمدتش عليك طول حياتى و كمان متعوده انى اشيل الهم.
حازم عاوزانى اقولك ايه
نهله اى حاجه.. يعنى ندى و فارس بيحكولى دايما عن نفسهم لكن انت لا.
حازم اسألينى
و انا اوعدك انى اجاوبك على اى حاجه تسأليها.
نهله طيب انا بصراحه مفيش حاجه معينه فى دماغى بس خلينى اسألك على حاجه انت قولتهالى.
حازم ايه هى
نهله مين البنت اللى بتفكرك بيها اغنية كلمات
نظر لها حازم و عيونه كلها ألم ثم نظر للأرض. تخيلت انه لن يرد عليها و لكن بعد ثوان بدأ يتحدث.
حازم بنت زميلتى كانت فى كورال الجامعه. كانت دايما بتغنى الاغنيه دى مره كنت مع اصحابى و هما كانوا فى فريق المسرح بس يعرفوها و بيحبوا صوتها اوى فخدونى معاهم اسمع بروفه ليها. خدتنى بصوتها من اول ما سمعتها و هى بتغنى بإحساس خطفت قلبى. عرفونى اصحابى عليها و علاقتنا ببعض اتوطدت مع الايام و حبيتها بجنان و برومانسيه رهيبه. لما بفتكر اللى كنت بحاول اعملهولها و مفاجأتى ليها دايما بحس انى كنت اهبل.
نهله طيب و هى حبتك
حازم كانت بتقول ان هى كمان بتحبنى.
نهله
حازم اكيد لأنها فجأه اتخطبت لواحد صاحبى.
نهله من غير اى مقدمات.
حازم قعدت اسبوع متجيش الجامعه و لا ترد على تليفوناتى و اصحابها بيتهربوا منى بأى حجه و لما رجعت كان فى ايدها دبله و شوكولا بتوزعها و لما سألت على العريس عرفت انه واحد صاحبى.
نهله الاتنين اندل من بعض.
نظر لها حازم و ابتسم.
نهله لسه بتحبها
حازم لا طبعا.
نهله بس لسه بتسمع الاغنيه
